काठमाडौं । राष्ट्रिय जनमोर्चाले मंसिर १४ गते देशब्यापी आयोजना गरेको संघीयता विरुद्धको आन्दोलनमा सहभागी नेता, कार्यकर्ता र जनता तथा आन्दोलनप्रति ऐक्यवद्धता प्रकट गर्ने विदेशस्थित नेपालीहरुप्रति धन्यवाद दिएको छ ।
सोमबार एक विज्ञप्ति प्रकाशित गरी राजमो उपाध्यक्ष एवं प्रवक्ता दुर्गा पौडेलले देशका २२ भन्दा बढी जिल्लाहरुमा कार्यक्रम सम्पन्न भएको र १६ वटा देशमा रहेका नेपाली एकता समाजले कार्यक्रमप्रति ऐक्यवद्धता जनाएको जानकारी दिनुभएको छ ।
सो आन्दोलनमा सहभागी सबैलाई धन्यवाद दिँदै राजमोले राष्ट्रियता, सार्वभौमिकता, अखण्डता र जनजीविकाको पक्षमा सचेत रहन र सबै कार्यक्रममा ऐक्यबद्ध हुन पनि आम जनतामा अपील गरेको छ ।
वक्तव्यमा भनिएको छः
राष्ट्रिय जनमोर्चाको आयोजनामा संघीयताको खारेजी, कोरोना संक्रमितको निशुल्क उपचार, भारतद्वारा नेपालको अतिक्रमित भूमि फिर्ता र एमसीसी खारेजीको माग गर्दै २०७७ मंसिर १४ गते देशव्यापी प्रदर्शन भएको छ । पार्टीले गरेको प्रदर्शनप्रति विश्वमा रहेका नेपाली एकता समाजहरुले पनि ऐक्यबद्धता व्यक्त गरेका छन् ।
डोटी, कैलाली, कञ्चनपुर, बर्दिया, सुर्खेत, दैलेख, कालीकोट, दाङ, रोल्पा, प्यूठान, गुल्मी, बाँके, कपिलवस्तु, अर्घाखाँची, रुपन्देही, पाल्पा, परासी, नवलपुर, चितवन, पोखरा, बाग्लुङ, काठमाडौंमा विरोध कार्यक्रम सम्पन्न भएका छन् । ती कार्यक्रमहरुमा मोटरसाइकल ¥याली, जुलुस प्रशर्दन तथा सभाहरु सम्पन्न भएका छन् । राािष्ट्रय जनमोर्चाको आयोजनामा भएका विरोध कार्यक्रममा सहभागी पार्टीका नेता, कार्यकर्ता, विद्यार्थी, युवा, महिला, वकिल, किसान, मजदुर, कलाकार, पत्रकार, बुद्धिजीवी, दलित, जनजाति, तराइ मधेस संगठन र आम जनतालाई हार्दिक धन्यवाद व्यक्त गर्दछौं । राष्ट्रियता, सार्वभौमिकता, अखण्डता र जनजीविकाको पक्षमा सचेत रहन र सबै कार्यक्रममा ऐक्यबद्ध हुन आम जनतामा अपील गर्दछौं ।
भारतका विभिन्न राज्यहरुमा मूलप्रवाह अखिल भारत नेपाली एकता समाजले कार्यक्रम आयोजना गरी ऐक्यबद्धता प्रकट गरिएको छ । कुवेत, जापान, कतार, संयुक्त अरब इमिरेट्स, साउदी अरब, ओमन, बहराइन, मलेसिया, कोरिया, बेल्जियम, पोर्चुगल, बेलायत, फ्रान्स, स्पेन र हङकङका नेपाली एकता समाजले राष्ट्रिय जनमोर्चाको संघर्षप्रति ऐक्यबद्धता जनाएकोमा हाम्रो पार्टी विदेशस्थित सबै नेपाली एकतासमाजप्रति धन्यवाद व्यक्त गर्दछ ।
२०७७ मंसिर १५ गते
दुर्गा पौडेल
उपाध्यक्ष तथा प्रवक्ता
