कावासोती । राष्ट्रिय जनमोर्चा नवलपुरले कोरोना सङ्क्रमण र सङ्घीयताको बारेमा विरोधसभा सम्पन्न गरेको छ । राजमोको केन्द्रीय निर्णयानुसार मङ्सिर १४ गते सो सभा सम्पन्न भएको हो ।
विरोधसभालाई सम्बोधन गर्दै राष्ट्रिय जनमोर्चाका पूर्व केन्द्रीय सचिव कृष्ण अधिकारीले सङ्घीयता खारेजीको विकल्प नभएको बताउनुभयो । कोरोना सङ्क्रमणको तात्कालिक सन्दर्भमा सङ्घीयता खारेजीको औचित्यता अझ पुष्टि भएको बताउँदै उहाँले सङ्घीय संरचनालाई खारेज गरेर सरकारको मुख्य ध्यान कोरोना महामारीको नियन्त्रणमा जानुपर्ने बताउनुभयो ।
सम्बोधनको क्रममा नेता अधिकारीले कोभिड–१९ ले देश आक्रान्त भइरहेका बेला स्वास्थ्य सामग्रीमा भ्रष्टाचारका गन्ध आउनु दुखद भएको बताउँदै त्यसबारे तत्कालै छानबिन गर्नुपर्ने आवश्यकतामा जोड दिनुभयो ।
राजमो नवलपुरका अध्यक्ष दिपक पाण्डेको अध्यक्षता तथा कृष्ण सापकोटाको सञ्चालनमा अगाडि बढेको उक्त विरोधसभामा उपस्थित जनसमुदायलाई राजमो जिल्ला उपाध्यक्ष विकाराम चौधरीले स्वागत गर्नुभएको थियो ।
