प्युठान । राष्ट्रिय जनमोर्चाका उपाध्यक्ष एवं सांसद दुर्गा पौडेलले देशले अब संघीयता धान्नै नसक्ने अवस्थामा पुगेको बताउनुभएको छ । संघीयता धान्न लिइएको वैदेशिक ऋणले देशलाई थिच्दै गएको भन्दै पौडेलले अब संघीयताको भारी बिसाउने बेला आएको बताउनुभएको हो ।
राष्ट्रिय जनमोर्चाले देशब्यापी आयोजना गरेको संघीयता विरुद्धको कार्यक्रम अन्तर्गत प्युठानको खलंगा बजारमा आयोजित सभालाई सम्बोधनज गर्दै प्युठानका सांसदसमेत रहेकी राजमो प्रवक्ता पौडेलले देशमा देखिएका धेरै समस्याको कारक संघीयता भएको उल्लेख गर्नुभयो । उहाँले संघीयताको खारेजी नै अहिलेको विकल्प भएको स्पस्ट पार्नुभयो ।
उहाँले भन्नुभयो ‘अहिले देशमा गम्भीर आर्थिक संकट पैदा भएको छ, वैदेशिक ऋण थपिँदै गएको छ, अब देशले संघीयता धान्न सक्दैन, यो उखेलेर फ्याँक्नुपर्छ । यसका लागि नेपाली जनता बेलैमा सचेत हुनुपर्दछ ।’
उहाँले कोरोनाको बेला सरकारले उपचार र राहतका कार्यक्रम ल्याउनुको साटो सरकारका मन्त्रीहरु भ्रष्टाचारमा केन्द्रित हुनु दुर्भाग्य भएको जिकिर गर्नुभयो । फरक प्रसङ्गमा उहाँले नेकपा भित्र देखिएको आन्तरिक किचलोले देशलाई गम्भीर क्षति हुने औल्याउँदै सत्तारुढ दललाई आन्तरिक सहमतिबाट निकास खोज्न आग्रह गर्नुभयो ।
कार्यक्रमलाई राष्ट्रिय जनमोर्चाका केन्द्रीय सदस्य तथा जिल्ला अध्यक्ष कृष्ण खड्का, राष्ट्रिय जनमोर्चा लुम्बिनी प्रदेशका अध्यक्ष बोमबहादुर खत्री, अखिल (छैठौं)का केन्द्रीय सचिव सुवाश जिसिले समेतले सम्बोधन गर्नुभएको थियो ।
कार्यक्रममा जिल्ला समन्वय प्रमुख केशब आचार्य, मल्लरानी गाउँपालिकाका अध्यक्ष अमरध्वज राना, अखिल नेपाल युवक संघका केन्द्रीय सदस्य हुमलाल नेपाली, जातीय समता समाजका गोपाल नेपाली राष्ट्रिय जनमोर्चाका नेता ध्रुब थापा, अन्टुकका सुरेश श्रेष्ठ, अखिल नेपाल महिला संघकी पद्मा पण्डित, अखिल नेपाल किसान महासंघका मिनबहादुर केसी लगाएतका नेताहरुको उपस्थिती रहेको थियो ।
कार्यक्रमको अध्यक्षता राष्ट्रिय जनमोर्चाका जिल्ला उपाध्यक्ष इमानसिंह खड्का, स्वागत जिल्ला कोषाध्यक्ष कृष्णप्रसाद श्रेष्ठ र संचालन जिल्ला सचिव विदुर मल्लले गर्नुभएको थियो ।
संघीयता, कोराना भाइरस, राष्ट्रियता र भ्रष्टाचारका सन्दर्भमा सरकारले अपनाएको गलत नीति र कार्यक्रमका विरुद्ध राजमोले देशब्यापी विरोधसभाको कार्यक्रम आयोजना गरेको हो ।
