दैलेखबजार । राष्ट्रिय जनमोर्चा जिल्ला समिति दैलेखले दैलेखबजारस्थित देवकोटा चोकमा आज कोणसभा गरेको छ ।

सभालाई सम्बोधन गर्दै राजमो कर्णाली प्रदेशका अध्यक्ष भरतबहादुर शाहीले सङ्घयता खारेज गरी प्रजातान्त्रिक विकेन्द्रीयता र स्वायत्त शासनमाथि आधारित एकात्मक शासन प्रणाली लागु गर्न अब ढिलो गर्न नहुने बताउनुभयो । सङ्घीयता खारेजीको आन्दोलनमा होमिन उचित समय आइसकेको भन्दै उहाँले आन्दोलनमा उत्रिन आह्वान पनि गर्नुभयो ।

कोणसभालाई सम्बोधन गर्दै राजमो जिल्ला अध्यक्ष अम्बरबहादुर नेपालीले कोरोना पिसिआर र उपचार सरकारले निःशुल्क गर्न माग गर्दै कालापानी लिपुलेक लिम्पियाधुरालगायतको भूमि तत्काल फिर्ता गर्न सरकारले पहलकदमी चाल्न आग्रह गर्नुभयो ।

कोणसभाको सञ्चालन अखिल नेपाल जनजाति सम्मेलनका केन्द्रीय सदस्य कलम बरैले गर्नुभएको थियो ।