बसन्त खड्का, अर्घाखाँची ।
राष्ट्रिय जनमोर्चाले संघीयता विरुद्ध अर्घाखाँचीको सन्धिखर्कमा विरोध सभा सम्पन्न गरेको छ। संघीयताको खारेजी तथा राष्ट्रियताको रक्षा, कोभिड महामारिमा सरकारको लापरवाही, अनियमितता र भ्रष्टाचारको बिरुद्ध जुलुश प्रदर्शनसहित सभाको आयोजना गरिएको हो ।
राजमो जिल्ला पार्टी कार्यालय मसाल बजारबाट निस्किएको मौन जुलुस सन्धिखर्कको शान्ति बगैंचामा पुगेर बिरोध सभामा परिणत भएको थियो ।
कार्यक्रममा नेकपा (मसाल) का जिल्ला प्रवक्ता पशुपति ढकालले सम्बोधन गर्दै वर्तमान सरकार भ्रष्टचारमा लिप्त भएको आरोप लगाउनु भयो । उहाँले सरकार जनताका समस्याप्रति उदासिन बनेको आरोप पनि लगाउनुभयो । नेता ढकालले संघीयता देशको लागि अभिसाप बनेकोले यसलाई जतिसक्दो छिटो खारेज गर्नुपर्ने बताउनुभयो ।
यस्तै, राजमो जिल्ला अधक्ष्य थम्मन केसीले देशको वर्तमान अबस्था कहालीलाग्दो भएको बताउनुभयो । उहाँले सरकार ओमनिको माध्यमबाट भ्रष्टाचारमा लिप्त भैरहेको र जनताको जिवन उत्थानका बिषयमा मौन भएको आरोप लगाउँदै सरकार राष्ट्रघाततर्फ उद्दत भएको आरोप लगाउनुभयो । नयाँ नक्सा पाठ्यक्रममा राख्ने प्रक्रिया रोक्नुनै राष्ट्रघातको ताजा उदाहरण भएको उहाँको भनाई थियो ।
फरक प्रसंगमा अर्घाखाँचीमा कोभिड–१९ बाट युवाहरुको निधन हुँदा पनि प्रशासन मौन भैरहेको बताउँदै केसीले ठुला–ठुला मुर्ति र सडकका नाममा लगानि गर्न सक्रिय हुने तर जनस्वास्थ्यको विषयमा किन उदास ?भनेर प्रश्न गर्नुभयो ।
कालापानी, लिपुलेक, लिम्पियाधुरा हाम्रो हो भनेर राजमोले भन्दा हास्ने नेकपा र कांग्रेसका साथीहरूले पछि कुरा बुझेको उल्लेख गर्दै अध्यक्ष केसीले अतिक्रमित भूमि फिर्ता गर्न अब धेरै ढिलाइ गर्न नहुने बताउनुभयो ।
राष्ट्रिय जनमोर्चाका जिल्ला सचिव बाबुराम पन्थि सुनारको सञ्चालनबाट अघि बढेको विरोध कार्यक्रममा राजमोका नेता कार्यकर्तासहित सयौं स्थानीयको सहभागिता थियो ।
