बागलुङ । राष्ट्रिय जनमोर्चा बागलुङले मंसिर १४ गते जिल्लाका १० स्थानमा एकैसाथ विरोध सभाको आयोजना गर्ने भएको छ ।
राजमोले संघीयताको खारेजी, कोरोना भाइरसको रोकथाम र उपचारमा सरकारको असक्षमता एवम् लापरबाही र भ्रष्टचार विरुद्ध मंसिर १४ गते देशब्यापी विरोध प्रदर्शन गर्दैछ । सोही कार्यक्रम अन्तर्गत बागलुङका मुख्य १० स्थानमा विरोध सभाको आयोजना गरिएको हो ।
बुधबार जिल्ला अध्यक्ष अमर थापाको अध्यक्षतामा बसेको जिल्ला समितिको बैठकले विरोधसभामा बोल्ने वक्ताहरुसमेत तय गरेको अध्यक्ष थापाद्वारा जारी विज्ञप्तिमा जनाइएको छ ।
जस अन्तर्गत बागलुङ बजारमा गण्डकी प्रदेश सांसद कृष्ण थापा, कुश्मीसेरा बजारमा जिल्ला अध्यक्ष अमर थापा, गल्कोट हटिया बजारमा केन्द्रीय सदस्य तथा जिल्ला समन्वय समितिका अध्यक्ष राजेन्द्र ढुंगाना, बुर्तिवाङ बजारमा गण्डकी प्रदेशसभा सदस्य खिम विक्रम शाही, बरेङ बजारमा केन्द्रीय सदस्य तथा गण्डकी प्रदेश सभा सदस्य पियारी थापा, ग्वालीचौरमा जिल्ला उपाध्यक्ष धर्म कुँवर, घुश्मेली बजारमा राष्ट्रिय परिषद सदस्य तिलक थापा, झिवाखोला बजारमा जिल्ला सचिव भिमलाल पोखरेल, बोङ्गादोभानमा राष्ट्रिय परिषद सदस्य गौरीस्वर पाण्डे र अक्षेतेमा जिल्ला सचिवालय सदस्य नेत्र बहादुर बुढाथोकीले सम्बोधन गर्नु हुने छ ।
बैठकले सरकारका गलत नीति, वैदेशिक हस्तक्षेप र एमसीसी सम्झौताको विरुद्धमा चलेको संयुक्त आन्दोलनप्रति ऐक्यवद्धता जनाउँदै बागलुङ जिल्लामा पनि त्यस विषयमा संघर्षका कार्यक्रम गर्ने निर्णय गरेको छ ।
यस्तै, विगतको निर्वाचनको सन्दर्भमा बामपन्थी जनमतको मनोविज्ञानलाई एकीकृत गरी निर्वाचनमा सफलता प्राप्त भएको र त्यो मनोविज्ञानलाई विकास निर्माणमा परिणत गरी जनताको आकांक्षा परिपूर्ति गर्न नसकिएको भन्दै राजमोले निर्वाचनका सहयात्री दलहरु बिच सहकार्य र एकतालाई सुदृढ पार्नु पर्ने आवश्यकता भएपनि सहयात्री दलबाट सहकार्य नहुनु दुःखद भएको ठहर गरेको छ ।
यस्तै, २०७७ चैत्र २४,२५ र २६ गते काठमाडौंमा सम्पन्न हुने चौथो राष्ट्रिय सम्मेलन सफल पार्न जिल्ला तहका कतिपय संगठनात्मक निर्णयहरु गरिएको जनाइएको छ । जस अनुसार पहिलो चरणमा सदस्यता वितरण र नविकरणलाई तिव्रता दिईने छ भने दोश्रो चरणमा भेला तथा प्रशिक्षणका कार्यक्रम गरिनेछ ।
