काठमाडौं । दुई दिने नेपाल भ्रमणका लागि भारतीय विदेश सचिव हर्षवर्धन श्रृंगला बिहीबार नेपाल आउँदैछन् । दुई दिने नेपाल भ्रमणमा आउन लागेका उनले नेपाली समकक्षी परराष्ट्रसचिव भरतराज पौडेलसँग नेपाल–भारत सम्बन्धका विविध विषयमा द्विपक्षीय वार्ता गर्ने भारतको विदेश मन्त्रालयले जनाएको छ।
भारतीय विदेश मन्त्रालयका अनुसार भ्रमणको समयमा नेपालका अन्य उच्च अधिकारीहरुसँग पनि भेट हुने छ । २०७६ भदौको पहिलो साता भारतीय विदेशमन्त्री एस जयशंकरले नेपालको दुई दिने भ्रमण गरेपछि विदेशसचिव श्रृंगला नेपाल आउने भारतका वरिष्ठ कुटनीतिज्ञ हुन् ।
भारतका रक्षामन्त्री राजनाथ सिंहले गत मे महिनामा उत्तराखण्डको लिपुलेखलाई धार्चुला जोड्ने ८० किलोमिटर लामो सडकको उद्घाटन गरेपछि नेपाल भारत तनाव बढेको छ ।
नेपाली भूभाग समेटेर भारतले नयाँ नक्सा सार्वजनिक गरेपछि नेपालले पनि जवाफमा देशको वास्तविक नक्सा जारी गरेको थियो । यसपछि दुई देशबीचको सम्बन्धमा थप तीक्तता आएको छ ।
नेपालले जारी गरेको नयाँ नक्साबारे नकारात्मक र अव्यावहारिक टिप्पणी गरेका सेना प्रमुख जनरल एमएम नरवणे यही महिनाको आरम्भमा नेपाल आएका थिए । उनले नेपालका शीर्ष नेताहरूसँग भेट गरेका थिए । त्यसको केही समय अघि मात्रै भारतीय गुप्तर संस्था ‘रअ’ का प्रमुख सामान्तकुमार गोयलले प्रधानमन्त्रीसँग भेट गरेका थिए ।
पछिल्लो समयमा एक पछि अर्का भारतीय प्रतिनिधि नेपालमा आउन थालेका छन् भने सरकारले पनि कालापानी लगायत अतिक्रमित क्षेत्रको मुद्दालाई महत्व दिन छोडेको देखिन्छ । नेपालले आफ्नो संविधान आफैँ बनाएबापत पाँच महिना लामो नाकाबन्दी लगाएको भारतले पटक पटक संविधान परिवर्तन गर्नसमेत दबाब दिँदै आएको छ ।
