गणेश अधिकारी, पोखरा ।
राष्ट्रिय जनमोर्चा गण्डकी प्रदेशका अध्यक्ष शंकर बरालले फेरि राजतन्त्र फर्कन्छ कि भन्ने सपना नदेख्न प्रतिगामीहरुलाई चेतावनी दिनुभएको छ ।
आइतबार २२ दल तथा संगठनहरुले पोखरामा आयोजना गरेको विरोध प्रदर्शनमा बोल्दै नेता बरालले सत्ता र प्रतिपक्षीको नालायकीपनबाट उत्साही बनेका राजावादीहरु फेरि प्रतिगमन फर्कन्छ कि भन्ने आशमा नारा जुलुस गर्न थालेको भन्दै जनताले किनारा लगाएको शक्ति फर्केर आउन नसक्ने बताउनुभयो ।
नेता बरालले अहिले केपी ओलीको सरकारले देश र जनताको पक्षमा धेरै काम गर्न सक्ने अवस्था भएपनि आन्तरिक किचलोमा अल्झेर समय खेर फालेको बताउनुभयो । उहाँले ओलीले सत्ता जोगाउन पश्चिमा शक्ति र भारतीय साम्राज्यवाद अगाडि दब्बु नीति लिएको आरोप पनि लगाउनुभयो ।
उहाँले प्रतिपक्षी दल कांग्रेसले पनि प्रतिपक्षको भूमिका खेल्न नसकेको बताउनुभयो । रास्ट्रघाती एमसीसी पास गराउन सत्ता र प्रतिपक्षबीच कार्यगत एकता भएको पनि उहाँले बताउनुभयो । नेता बरालले मिचिएको भूमि फिर्ता गर्न, भ्रष्टाचार नियन्त्रण र जनजीवीकाका लागि जनताले सरकारलाई थप दबाब दिनुपर्ने आवश्यकता औँल्याउनुभयो ।
आइतबार देशब्यापी कार्यक्रम अन्तर्गत नेकपा (मसाल) सहित कास्की जिल्लामा क्रियाशील १४ राजनीतिक दलले विरोध प्रदर्शन आयोजना गरेका हुन् ।
कार्यक्रमलाई नेकपा (माले) का केन्द्रीय सदस्य होमनाथ गिरी, देजमो प्रदेश अध्यक्ष नेत्र रानाभाट, नेकपा (मसाल) कास्कीका प्रवक्ता चन्द्रबहादुर केसी, क्रान्तिकारी (माओवादी) का केन्द्रीय सदस्य नारायण अधिकारी लगायत नेताहरुले सम्बोधन गर्नुभएको थियो ।
कार्यक्रमको सञ्चालन राष्ट्रिय जनमोर्चा कास्कीका अध्यक्ष रबिमोहन ढकालले गर्नु भएको थियो ।
