वीरेन्द्रनगर । धिरेन थापा (अनुपम) र ओमप्रकाश धमला राष्ट्रिय जनमोर्चाबाट निस्कासित हुनुभएको छ । राष्ट्रिय जनमोर्चा सुर्खेतका सचिव लालबहादुर नेपालीको हस्ताक्षरमा जारी प्रेसविज्ञप्तिमा सो जानकारी दिइएको हो ।
यसबारे विज्ञप्तिमा भनिएको छ– “राष्ट्रिय जनमोर्चा सुर्खेतका साधारण सदस्यद्वय धिरेन थापा (अनुपम) र ओमप्रकाश धमलाले पार्टी अनुशासन विरुद्धको क्रियाकलापमा सहभागी भई पार्टीको हित विपरीत कार्य गरेको पाइएकाले उहाँहरू दुवै जनालाई पार्टीको साधारण सदस्तसमेत नरहने गरी अनिश्चित कालका लागि निस्कासन गरिएको छ ।” विज्ञप्तिमा उहाँहरू दुवै जनासँग कुनै पनि साङ्गठनिक भेटघाट तथा छलफल नगर्न/नगराउन पनि अनुरोध गरिएको छ ।
ढिलो गरी प्रसारित प्रेसविज्ञप्तिमा सङ्घीयताको खारेजी, कोरोना महामारीको रोकथाम तथा भ्रष्टाचारको विरुद्धमा आगामी मङ्सिर १४ गते सुर्खेतको सदरमुकाम वीरेन्द्रनगरमा आयोजित विरोधसभालाई सफल पार्न आम जनसमुदायसित अपिल गरिएको छ ।
त्यस्तै, राजमो सुर्खेतले आगामी चैत्र २४, २५ र २६ गते काठमाडौँमा सम्पन्न हुने राष्ट्रिय जनमोर्चाको चौथो राष्ट्रिय सम्मेलनलाई सफल पार्न सबै खालको सहयोग गर्ने निर्णय गरेको पनि विज्ञप्तिमा उल्लेख छ ।
