पुष्कर भट्ट, महेन्द्रनगर ।
अखिल नेपाल किसान महासंघले कैलाली र कञ्चनपुरका प्रमुख जिल्ला अधिकारीलाई ज्ञापन पत्र बुझाएको छ । बिहीबार दुवै जिल्ला प्रशासन कार्यालयमा किसान नेतासहित पुगेको प्रतिनिधिमण्डलले ज्ञापन बुझाएको हो ।
सरकारले किसानलाई समयमा पर्याप्त मलखादको व्यवस्था गर्न नसकेको, भएको मल पनि तस्करको हातबाट किसानसँग दोब्बर मूल्य असुलि गर्दासमेत सरकार मौन रहेको भन्दै सरकारलाई खबरदारी गर्न ज्ञापन बुझाइएको हो । कञ्चनपुर जिल्ला प्रशासन कार्यालयमा ज्ञापन पत्र बुझाउन अखिल नेपाल किसान महासंघ कञ्चनपुर जिल्ला प्रतिनिधि पदम साउद, अखिल (छैठौं) का महासचिव महेशराज जोशी, अखिल (छैठौं) सुप प्रदेश सदस्य तथा कञ्चनपुर जिल्ला सचिव पुष्कर भट्ट, विद्यार्थी नेता दिव्या जोशी, भागरथी जोशी लगायतका नेताहरुको सहभागिता रहेको थियो ।
यता, कैलालीमा किसान महासंघका केन्द्रीय सदस्य हरिकृष्ण पाण्डेको नेतृत्वमा गएको टोलीले प्रमुख जिल्ला अधिकारीलाई ज्ञापन पत्र बुझाएको छ । प्रतिनिधिमण्डलमा राजमोका केन्द्रीय सदस्य नन्दराज भट्ट, तराई मधेश जनवादी मोर्चाका महासचिव राजाराम चौधरी, राजमो नेताहरु तिलक जिसी, जगत जोशी, विक्रम विकलगायत नेताहरुको सहभागिता रहेको थियो ।
