वसन्त खड्का
सन्धिखर्क । किसानहरूका समस्या उठाउँदै अखिल नेपाल किसान महासङ्घ जिल्ला समिति अर्घाखाँचीले जिल्ला प्रसाशन कार्यालय अर्घाखाँचीमा ज्ञापनपत्र बुझाएको छ ।
किसानले बिउ, मलको सधै अभाव झेल्नुपरेको, सरकारले धानको मूल्य सन्तोषजनक रूपमा तोक्न नसकेको भन्दै जिल्ला प्रसाशन कार्यालयका प्रमुख जिल्ला अधिकारी विष्णु पौडेलमार्फत नेपाल सरकारलार्इ ज्ञापनपत्र बुझाएको हो ।
ज्ञापनपत्र बुझ्दै प्रमुख जिल्ला अधिकारी पौडेलले समस्या समाधानका लागि आफूले सक्दो प्रयास जारी राख्ने बताए । ज्ञापनपत्रको महासङ्घका जिल्ला अध्यक्ष जीवनारायण खनालले वाचन गरी प्रमुख जिल्ला अधिकारिलार्इ बुझाइएको हो ।
उक्त अवसरमा १२ देखि १ बजेसम्म जिल्ला प्रसाशनको गेटमा एक घन्टे धर्ना कार्यक्रम र कोणसभा गरिएको थियो ।
उता, सन्धिखर्क नगरपालिकाका प्रमुख कमलप्रसाद भुसाललार्इ पनि सोही प्रकृतिको ज्ञापनपत्र महासङ्घले बुझाएको थियो। जिल्ला प्रसाशन कार्यालयमा गरिएको धर्ना र कोणसभा कार्यक्रमपछि नगरपालिकामा ज्ञापनपत्र बुझाइएको थियो ।
ज्ञापनपत्र बुझ्दै सन्धिखर्क नगरपालिकाका प्रमुख कमलप्रसाद भुसालले आफू र नगरपालिका कृषि, बेरोजगारी र उत्पादनमा बिचौलियाको बिगबिगीलगायतका समस्या समाधानका लागि सधैँ तत्पर रहेको बताए । उनले चिस्यान केन्द्र र कृषि हाटबजारको विकासमा नगरपालिका तत्पर रहेको बताउँदै त्यसपछि थप समस्या समाधानमा सहज हुने पनि बताए । सरकारले माथिल्लो तहबाट समस्या समाधन गर्नुपर्ने बताउदै ज्ञापनपत्रमा आफ्नो साथ समर्थन रहेको र आफूले सक्दो पहल गर्ने उनले बताए ।
ज्ञापनपत्र बुझाउने कार्यक्रममा राजमो नेता शेरबहादुर बिसी, राजमो जिल्ला अधक्ष थम्मन केसी, किसान महासङ्घका जिल्ला अध्यक्षक्ष जीवनारायण खनाल, अखिल नेपाल महिला सङ्घकी महासचिव सकुन्तला रानालगायत किसान, बुद्धिजीवी, पत्रकारलगायतको उपस्थिति थियो ।
