काठमाडौं । नेपाल र भारतबीच सीमा विवाद जारी रहेको बेलामा नरेन्द्र मोदी सरकारले भारतीय विदेश सचिव हर्षवर्धन स्रिंगलालाई नेपाल पठाउने भएको छ । लिम्पियाधुरा, कालापानी र लिपुलेकलाई लिएर सीमा विवाद भइरहेका बेला स्रिंगलाको भ्रमणको प्रमुख उद्देश्य नै सीमा विवादसँग सम्बन्धित रहने भारतीय विदेश मन्त्रालयका अधिकारीहरुले बताएका छन्।
स्रिंगला नोभेम्बर महिनाको अन्तिमतिर काठमाडौं आउने भारतीय सञ्चार माध्यमले जनाएका छन् । सीमा विवादसँगै दुवै देशबीच कूटनीतिक र राजनीतिक संवाद ठप्प रहेको थियो ।
गत हप्तामात्रै भारतीय स्थल सेनाध्यक्ष मनोज मुकुन्द नरवणे नेपाली सेनाको मानार्थ महारथी दर्जा ग्रहण गर्न तीन दिने नेपाल भ्रमणमा आएका थिए । प्रधानमन्त्री केपी शर्मा ओली र नरवणेको भेटमा सीमा विवादको कुरा उठेको र नरवणेले दिल्लीको असन्तुष्टिबारे ओलीलाई ब्रिफिङ गरेका थिए ।
नरवणले स्वदेश फिर्ता भएपछि दिल्लीमा नेपाली पक्षसँग भएको छलफलबारेमा ब्रिफिङ गरेका थिए । त्यसपछि मोदी सरकार विदेश सचिव स्रिंगलालाई वार्ताका लागि काठमाडौं पठाउन राजी भएको बताइएको छ।
नोभेम्बर २६ र २७ मा नेपाल भ्रमणमा आउने स्रिंगलाले परराष्ट्र सचिव भरतराज पौड्यालसँग भेटवार्ता गर्ने तय भएको हिन्दुस्तान टाइम्सले जनाएको छ। यस्तै उनले राष्ट्रपति विद्यादेवी भण्डारी, प्रधानमन्त्री केपी शर्मा ओली र परराष्ट्र मन्त्री प्रदीप ज्ञवालीसँग समेत शिष्टाचार भेट गरी छलफल गर्ने जनाइएको छ।
नरवणेअघि कोरोना संक्रमणका कारण नेपाल र भारतबीच हवाई सेवा बन्द रहेको बेला रअ प्रमुख सामन्त गोयलले काठमाडौं आएर ओलीसँग भेट गरेपछि दिल्ली संवादमा फिर्ता आउन चाहेको हो।
स्रिंगलाको नेपाल भ्रमणका क्रममा संयुक्त प्राविधिक सीमा जाँच समितिको बैठकको मिति समेत तय हुनसक्ने हिन्दुस्तान टाइम्सले उल्लेख गरेको छ।
