आजकाल पायल्स रोग धेरै मानिसहरुको समस्या भएको छ । पायल्स रोग के हो भन्ने थाहा नभएको तथा लाजका कारण धेरै मानिसहरुले यस रोगको बारेमा खुलेर परिवारसँग कुरा गर्ने गर्दैनन् ।
दिसा गर्दा रगत आउने, मलद्वारमा मासु पलाउने, दुख्ने, सुन्निने र चिलाउने जस्ता लक्षणहरु देखा परेमा पाइल्स भएको बुझ्न सकिन्छ ।
पायल्स रोगीमध्ये कसै कसैमा दिसा गर्दा पीप बग्ने, अंगुरको झुप्पोजस्तो मासु पलाउने तथा सुन्निएको डल्लो हुन सक्छ । यो रोग लाग्दा कसैलाई रगत आउँछ भने कसैलाई नआउन पनि सक्छ । पायल्स हुनुको मुख्य कारण भनेको हाम्रो खराव जीवनशैली र अव्यवस्थित खानपान हो । पानी कम खाने, हरियो सागपात नखाने, शारिरिक व्यायाम नगर्ने, धेरै व्रत बस्ने, बढि चिया पिउने, माछामासु तथा जंक फुड बढि खाने गर्दा हामीलाई पाइल्स लाग्ने समस्या हुन्छ ।
यसका साथै अनियमित खानपान, अनिन्द्राको समस्या, धेरै तनाव, रक्सी, चुरोट, सूर्तीको अत्यधिक सेवनने गर्नाले पायल्स तथा दिसाबाट रगत आउने, मासु पलाउनेजस्ता समस्याहरु सुरु हुन थाल्छ । कब्जियत, दिसा गोटा पर्नु, नियमित दिसा नहुनु, दिसा, पिसाब तथा पाद रोक्नु, अत्यधिक गर्मी वातावरणमा बस्नु, चिल्लो तथा तेलको प्रयोग बढी गर्नु पनि यस समस्याको मुख्य कारण हो ।
पाइल्सको समस्याले सताएको छ भने हामीले प्रशस्त मात्रामा पानी पिउनुका साथै रेसादार तथा फाइबर धेरै भएको हरियो सागपातहरु काँचै खाने, गहुँको रोटी, जौको सातु, रहर तथा मुगको दाल, मौसम अनुसारको फलफुल, मुला, काँक्रो, गाँजर, नरिबल, अनार, स्याउ, बेलजस्ता फलफुल, करेला, धनिया, लौकाको नियमित सेवनले पनि निकै फाइदा पुर्याउने गर्छ ।
बिहान अबेरसम्म नसुत्ने, खाली पेट नबस्ने, माछामासु, बासी तथा टरेको भुटेको खानेकुरा, अदुवा, चना, भन्टा, आलु, मासको दाल, पिरो, अमिलो, चिल्लो तथा मसला बढी भएको खानेकुराका साथ पूरानो अचार, जंक फुड, चियाकफी, चुरोट रक्सी, सुर्तीजन्य पदार्थबाट टाढा रहेने लगायतका कुरामा ध्यान दिने गरेमा लागिसकेको रोग पनि बिस्तारै कम हुँदै जान्छ ।
