गणेश अधिकारी, पोखरा ।
अमेरिकी सहयोगसम्बन्धी प्रस्ताव मिलेनियम च्यालेन्ज कर्पोरेसन (एमसीसी) सम्झौता खारेजीका लागि संघर्षरत नेकपा (मसाल) लगायतका राजनीतिक दलहरुले आज पोखरामा विरोध प्रदर्शन गरेका छन् । कास्कीमा क्रियाशील १४ राजनीतिक दलको संयुक्त संघर्ष समितिले बुधबार प्रदर्शन गरेको हो ।

‘एमसीसी खारेज गर, सीमा अतिक्रमण बन्द गर, भ्रष्टाचारीलाई कारबाही गर, शान्ति सुरक्षा कायम गर’ लगायतका विभिन्न नारा लेखिएका प्लेकार्ड बोकेर नाराजुलुशसहित पोखराको पृथ्वीचोकमा सभाको आयोजना गरिएको थियो ।

सभालाई सम्बोधन गर्दै राष्ट्रिय जनमोर्चाका गण्डकी प्रदेश अध्यक्ष शंकर बरालले बर्तमान सरकार दुई तिहाईको शक्तिशाली भएपनि सत्ता टिकाउन एमसीसी लागू गर्न खोजेर अमेरिकाको चाकडी गरेको आरोप लगाउनुभयो । उहाँले जनताको दबाबमा लिम्पियाधुरासहितको नक्सा सार्वजनिक गरेपनि सरकारले भारतका अगाडि नतमस्तक बनेर पाठ्यपुस्तक वितरणमा रोक लगाएको बताउनुभयो ।

नेता बरालले देशमा महंगी, भ्रष्टाचार बढ्दै गएको, चेलिबेटीहरु झन्पछि झन् असुरक्षित हुँदै गइरहेको तर, सरकारले सरकार भएको अनुभुति दिन नसकेको बताउनुभयो ।

कार्यक्रममा नेकपा (मसाल) कास्कीका प्रवक्ता चन्द्रबहादुर केसी, नेकपा (माओबादी) प्रदेश सेक्रेटरी भोजराज त्रिपाठी, नेकपा (माले) का केन्द्रीय सदस्य टेकनाथ भन्डारी, देजमो प्रदेश अध्यक्ष नेत्र रानाभाट, क्रान्तिकारी– माओवादीका केन्द्रीय सदस्य नारायण अधिकारी लगाएतका नेताहरुले सम्बोधन गर्नुभएको थियो ।

नेकपा (क्रान्तिकारी माओवादी) ४ नम्बर प्रदेशका सेक्रेटरी केश बहादुर परियारको अध्यक्षतामा भएको कार्यक्रमको सञ्चालन राष्ट्रिय जनमोर्चा कास्कीका अध्यक्ष रविमोहन ढकालले गर्नु भएको थियो ।