टेकराज भुसाल, बुटवल ।
प्रदेश ५ का आन्तरिक मामिला तथा कानुनमन्त्री कूलप्रसाद केसीको अभिव्यक्तिप्रति प्रतिपक्षी नेपाली कांग्रेसले आपत्ति जनाएको छ ।
मन्त्री केसीले प्रदेश सभामा असन्तुष्टि जनाउने सांसदहरुलाई ‘घिसारेर बाहिर निकाल’ भन्ने असहिष्णु, अमर्यादित ढंगले संसदको गरिमा र मर्यादा बिपरित बोलेर उत्तेजित बनाएको भन्दै कांग्रेसले विरोध जनाएको हो ।
सभामुखलाई साक्षी राखेर अशोभनीय र अमर्यादित शब्द प्रयोग गरिएको भन्दै ती शब्द संसद सचिवालयको रेकर्डिङबाट हटाउन र उक्त शब्द फिर्ता लिन रुलिङ गर्न सभामुखलाई अनुरोध समेत गरेको कांग्रेस प्रदेश संसदीय दलका सचेतक निर्मला क्षेत्रीले हस्ताक्षर गरेको प्रेस विज्ञप्तिमा उल्लेख गरिएको छ।
सोमबार प्रदेशसभामा कांग्रेसको अवरोधर नाराबाजीबीच मन्त्री केसीले प्रदेश ५ को नाम लुम्बिनी र राजधानी दाङको भालुवाङ क्षेत्र राख्न संसदमा प्रस्ताव प्रस्तुत गरेका थिए । लगत्तै केही सांसद तोडफोडमा उत्रिएपछि मन्त्रीले रोष्टमबाटै मर्यादापालकलाई तोडफोड गर्नेहरुलाई ‘घिसारेर बाहिर निकाल्न’ आदेश दिएका थिए ।
