काठमाडौं । सरकारले कोरोना भाइरस संक्रमणको जोखिम कम गर्न लकडाउन वा निषेधाज्ञा सम्बन्धी सबै अधिकार स्थानीय प्रशासनलाई दिएपछि देशका आधा भन्दा बढी जिल्लामा अहिले पनि निषेधाज्ञा कायमै छ ।
काठमाडौं उपत्यकाका तीनवटै जिल्लामा पूर्ण रुपमा निषेधाज्ञा कायम छ भने देशभरीमा गरेर ४९ वटा जिल्लामा पूर्ण वा आंशिक रुपमा लागू गरिएको छ । १० वटा जिल्लामा आंशिक रुपमा निषेधाज्ञा रहेको गृह मन्त्रालयले जनाएको छ ।
गृह स्रोतका अनुसार पूर्ण निषेधाज्ञा भएका जिल्लामा काठमाडौं उपत्यकाका तीन जिल्ला काठमाडौं, ललितपुर र भक्तपुरसहित सुनसरी, सर्लाही, स्याङ्जा, सिरहा, रौतहट, धनकुटा, पाल्पा, रामेछाप, दोलखा, नवलपरासी पूर्व, नवलपरासी पश्चिम, सिन्धुपाल्चोक र गोरखा रहेका छन्।
यस्तै, अर्घाखाँची, कास्की, डोल्पा, मोरङ, डोटी, कैलाली, प्यूठान, सप्तरी, धनुषा, पर्सा, महोत्तरी, बारा, दैलेख, कन्चनपुर, डडेल्धुरा, तेह्रथुम, संखुवासभा, रुपन्देही, चितवन, बैतडी, कपिलवस्तु, र दाङमा पनि पूर्ण निषेधाज्ञा रहेको छ ।
यस्तै, आंशिक निषेधाज्ञा रहेका जिल्लाहरुमा नुवाकोट, जुम्ला, दार्चुला, झापा, मकवानपुर धादिङ, तनहुँ, बाग्लुङ, रुकुम पश्चिम र जाजरकोट रहेका छन् ।
संक्रमणको जोखिम घटेपछि कतिपय जिल्लाले निषेधाज्ञा हटाएका छन् । गुल्मी, पाँचथर र कालीकोटमा निषेधाज्ञा हटेको छ ।
सरकारले जिल्ला तथा पालिकाहरुमा निषेधाज्ञा लगाउन सक्ने अधिकार जिल्ला प्रशासन कार्यालयलाई दिएको छ । विभिन्न पालिकाले पनि आफ्नो क्षेत्रमा संक्रमणको जोखिम बढेमा निषेधाज्ञा लागू गर्नको लागि जिल्ला प्रशासन कार्यालयमा सिफारिस गर्छन् ।
पहिलो पटक गत चैत ११ देखि देशब्यापी लकडाउन गरिएकोमा सरकारले गत साउन ७ गतेदेखि खोलेको थियो । त्यसपछि स्थानीय प्रशासनलाई नै अवस्था हेरेर जिल्लाब्यापी वा पालिकास्तरमा लकडाउन वा निषेधाज्ञा गर्नसक्ने अधिकार दिएको हो ।
