काठमाडौँ । चीनको दक्षिणपश्चिम सिजाङ स्वायत्त क्षेत्रमा सात म्याग्निच्युडको भूकम्प जाँदा कम्तीमा १६ जनाको मृत्यु भएको छ भने ३२ जना घाइते भएका छन् ।
नगरको आपत्कालीन व्यवस्थापन ब्युरोका अनुसार नाग्छु सहरको बाकेन काउन्टीमा कात्तिक ५ गते बिहीबार राति १० बजेर ३३ मिनेटमा उक्त भूकम्प गएको हो ।
भूकम्पमा परी घाइते भएकामध्ये ११ जनाको अवस्था गम्भीर रहेको छ भने २१ जनालाई सामान्य चोट लागेको छ । शुक्रबार बिहान २ बजेर २५ मिनेटसम्मको विवरणअनुसार भूकम्पले तीन सयभन्दा बढी घर भत्किएका छन् ।
भूकम्पबाट भएको क्षतिको विस्तृत विवरण सङ्कलन गर्ने काम भइरहेको बताइएको छ । प्रभावित क्षेत्रमा उद्धार तथा राहत कार्य जारी रहेको अधिकारीले जनाएका छन् ।
उद्धार तथा राहतका लागि तीन सयभन्दा बढी प्रहरी परिचालन गरिएको छ भने क्षेत्रीय अग्नि तथा उद्धार टोलीले प्रभावित क्षेत्रमा तीन सय ४७ जना जनशक्ति खटाएको छ ।
भूकम्पबाट भएको समग्र क्षतिको आँकलन भइरहेको र प्रभावित क्षेत्रमा उद्धार तथा राहत कार्यलाई तीव्रता दिइएको समाचार एजेन्सी सिन्ह्वाले जनाएको छ ।
