काठमाडौँ । शक्तिशाली समुद्री आँधी ‘चम्पी’ को प्रभावका कारण ताइवान र जापानका दुर्ई सय बढी उडान रद्द भएका छन् ।

ताइवानले बिहीबार स्थलक्षेत्रमा समेत चेतावनी जारीगरेसँगै आँधीको प्रभावस्वरूप अमेरिका र जापानको संयुक्त सैन्य अभ्याससमेत प्रभावित भएको हो ।

यस वर्ष प्रसान्त महासागर क्षेत्रमा देखिएका शक्तिशाली आँधीमध्ये ‘चम्पी’ एक मानिएको छ । सुरुमा यो ‘सुपर टाइफुन’ बनेको थियो ।

बिहीबार यसको शक्ति केही कमजोर भए पनि केन्द्र नजिक हावाको गति दुई सय २७ किलोमिटर प्रतिघण्टाभन्दा बढी रहेको ताइवानको केन्द्रीय मौसम विभागले जनाएको छ ।

मौसम प्रशासनका अनुसार आँधी ताइवानको दक्षिणी टुप्पोबाट करिब पाँच सय २० किलोमिटर दक्षिणपूर्वमा छ । यसको सम्भावित मार्गले ताइवानको उत्तरपूर्वी भाग हुँदै चीनको तटीय क्षेत्रतर्फ मोडिने र अन्तत: जापानको दक्षिणी भागमा प्रवेश गर्ने देखाएको छ ।

आँधीको प्रभाव क्षेत्रसमेत विस्तार भएर उक्त आँधीको गति करिब तीन सय २० किलोमिटर पुगेको छ । यसले ताइवानको अधिकांश भूभागलाई प्रभावित पार्न सक्ने र यसको असर झन्डै दुई दिनसम्म रहन सक्ने मौसमविद्ले बताएका छन् ।

तटीय क्षेत्रमा छ मिटरभन्दा अग्ला छाल आउन सक्ने चेतावनी मोबाइल फोनमार्फत जारी गरिएको छ । त्यस्तै, उत्तरी ताइवानका पहाडी क्षेत्रमा, राजधानी ताइपेई आसपाससमेत करिब एक मिटर वर्षा हुन सक्ने पूर्वानुमान गरिएको छ ।

ताइवानका राष्ट्रपति लाई चिङतेले सर्वसाधारणलाई आँधीको सामना गर्न तत्काल तयारी गर्न आग्रह गरेका छन् । उनले पहाडी तथा तटीय क्षेत्रमा नजान पनि सर्वसाधारणलाई सचेत गराएका छन् ।

ताइवान र जापान बढी प्रभावित

आँधीका कारण ताइवानमा बिहीबार १२५ उडान रद्द भएका छन् । तीमध्ये अधिकांश आन्तरिक उडान रहेको यातायात मन्त्रालयले जनाएको छ तर रेलसेवा भने अहिलेसम्म प्रभावित भएको छैन ।

चम्पी जापानको ओकिनावा प्रान्तअन्तर्गतको पश्चिमी बस्ती रहेको टापु योनागुनी हुँदै अघि बढ्ने पूर्वानुमान गरिएको छ ।

आँधीको प्रभावका कारण जापानका प्रमुख विमान सेवा कम्पनी जापान एयरलाइन्स, एएनए र स्काइमाक्रले बिहीबारदेखि आइतबारसम्मका सयभन्दा बढी उडान रद्द गरेका छन् । यसबाट ११ हजारभन्दा बढी यात्रुको यात्रा प्रभावित हुने भएको छ ।

आँधीको सम्भावित मार्ग र तीव्र वर्षाका कारण ताइवान तथा जापानका तटीय र पहाडी क्षेत्रमा जोखिम बढेको छ । हवाई यातायातसँगै सैन्य गतिविधिसमेत प्रभावित भएपछि दुवै क्षेत्रमा आँधीको प्रभावलाई नजिकबाट निगरानी गरिएको छ ।

पश्चिमी प्रसान्त महासागरको माइक्रोनेसिया क्षेत्रनजिक विकसित भएको सुपर टाइफुन चम्पी सन् २०२६ कै शक्तिशाली समुद्री आँधीमध्ये एक रहेको विज्ञहरूले बताएका छन् ।