काठमाडौं, कात्तिक २ । पूर्व अमेरिकी राष्ट्रपति बराक ओबामाले डेमोक्र्याट सांसद इल्हान ओमारविरुद्ध ट्रम्प प्रशासनले अघि बढाएको कानुनी कारबाहीको कडा आलोचना गरेका छन्। उनले यसलाई राजनीतिक प्रतिशोध र निर्वाचित जनप्रतिनिधिलाई तर्साउने प्रयास भन्दै अमेरिकी लोकतान्त्रिक मूल्यविरुद्धको कदम बताएका छन्।
एक्समार्फत जारी लामो विज्ञप्तिमा ओबामाले राष्ट्रपतिले आफ्ना आलोचकविरुद्ध संघीय सरकारको शक्ति प्रयोग गर्नु सबै अमेरिकीका लागि चिन्ताको विषय भएको उल्लेख गरेका छन्। यस्तो व्यवहार सामान्य बन्न पुगे भविष्यमा दुवै राजनीतिक दलका राष्ट्रपतिले पनि त्यसैलाई निरन्तरता दिन सक्ने उनको चेतावनी छ।
मिनेसुटाबाट प्रतिनिधित्व गर्ने सांसद ओमारमाथि सन् २००० मा अमेरिकी नागरिकता प्राप्त गर्दा गलत विवरण वा कागजात पेस गरेको आशङ्कामा अमेरिकी न्याय मन्त्रालयले अनुसन्धान गरिरहेको छ। गत सोमबार संघीय एजेन्टहरूले उनको वासिङ्टनस्थित घरमा छापा मारेर फोन जफत गरेको समाचारमा उल्लेख छ।
सन् १९९५ मा बाल्यकालमै सोमालियाबाट अमेरिका आएकी ओमारले नागरिकता प्राप्त गर्दा उमेरसम्बन्धी विवरणमा अनियमितता भएको हुन सक्ने अनुसन्धानकर्ताहरूको आशङ्का छ। सन् २०१९ मा पनि यही विषयमा समीक्षा गरिएको थियो, तर पर्याप्त प्रमाण नभेटिएपछि अनुसन्धान अघि बढाइएको थिएन।
ओमारले अनुसन्धानलाई राजनीतिक उद्देश्यबाट प्रेरित ‘विच हन्ट’ भन्दै अस्वीकार गरेकी छन्। ओबामाले पनि यस्ता कानुनी प्रयासले सांसदको व्यक्तिगत जीवन प्रभावित बनाउनुका साथै जनताको सेवा गर्ने काममा बाधा पुर्याएको बताएका छन्।
यस घटनालाई डेमोक्र्याट नेताहरूले शक्तिको दुरुपयोग भन्दै आलोचना गरेका छन्। यसैबीच, अमेरिकी अधिवक्ता जिनान पिरोले ओमारको आर्थिक विवरणसम्बन्धी छुट्टै अनुसन्धान पनि भइरहेको बताएकी छन्।
