उदयपुर, १ कात्तिक । उदयपुरको कटारी नगरपालिका–५ भोर्लेमा हायस गाडीको ठक्करबाट स्थानीय शिक्षक सुमन श्रेष्ठको मृत्यु भएपछि दोषीमाथि कारबाही र उचित क्षतिपूर्तिको माग गर्दै स्थानीयवासीले आइतबार प्रदर्शन गरेका छन्।

प्रदर्शनकारीले मदन भण्डारी राजमार्गअन्तर्गत कटारीको बुद्धचोकमा सडक अवरुद्ध गर्दा काठमाडौँबाट पूर्वतर्फ जाने यातायात प्रभावित भएको छ।

प्रहरीका अनुसार शनिबार राति करिब ११ बजे बागमती प्रदेश ०१–००६ ख ६८४४ नम्बरको हायसले को १ प ९६६२ नम्बरको मोटरसाइकललाई ठक्कर दिएको थियो। दुर्घटनामा घाइते शिक्षक श्रेष्ठलाई कटारी प्रादेशिक अस्पताल पुर्‍याइए पनि चिकित्सकले मृत घोषणा गरेका थिए।

इलाका प्रहरी कार्यालय कटारीका प्रमुख डीएसपी उपेन्द्र खरेलले हायस चालकलाई नियन्त्रणमा लिइएको र घटनाबारे थप अनुसन्धान भइरहेको जानकारी दिए।