वासिङ्टन, ३० असोज । अमेरिकी राष्ट्रपति डोनाल्ड ट्रम्पले सैन्य आधारमा गोली हान्ने दोषीलाई ‘फायरिङ स्क्वाड’ द्वारा दिइने मृत्युदण्डको लाइभ स्ट्रिम नगरिने बताउनुभएको छ । रक्षामन्त्री पीट हेगसेथको विवादास्पद योजना उहाँले रद्द गर्नुभएको हो ।
निदाल हसनको मृत्युदण्ड ‘लाइभ स्ट्रिम’ गर्ने योजना स्वदेश र विदेशमा व्यापक विरोध भएको थियो । अमेरिकी डेमोक्रेटिक र रिपब्लिकन राजनीतिज्ञ, क्याथोलिक चर्च, अधिकार समूह र संयुक्त राष्ट्र सङ्घले आक्रोश व्यक्त गरेका थिए ।
यो रद्द गर्ने निर्णय हेगसेथका लागि ठूलो झटका हो । उहाँ पहिले नै इरान युद्धको गतिरोध र त्यसको असरका कारण आलोचित हुनुहुन्छ । यसले आगामी मध्यकालीन चुनावमा रिपब्लिकन पार्टीको सम्भावनामा असर पार्दैछ ।
हसन ‘निर्धारित समयमा ‘फायरिङ स्क्वाड’ बाट मर्नेछन् तर यो घटना प्रत्यक्ष देखाइने (प्रसारण गरिने) छैन,” ट्रम्पले आफ्नो ट्रुथ सोसल प्लेटफर्ममा बिहीबार लेख्नुभएको छ ।
अमेरिकी राष्ट्रपतिले व्यक्तिगत रूपमा प्रत्यक्ष देखाइने योजनाको विरोध नगरेको सङ्केत दिनुभयो । उहाँले भन्नुभयो, “यसले संसारलाई देखाउन सक्थ्यो कि अमेरिका आतङ्कवादी र हसनजस्ता फोहोरसँग कसरी व्यवहार गर्छ ।”
तर “धेरै राम्रा र राम्रो नियतका मानिसहरू उहाँको मृत्यु हेर्न चाहँदैनन्,” ट्रम्पले भन्नुभयो । उहाँले थप्नुभयो, “पीडितका नजिकका परिवारले चाहेमा प्रत्यक्ष रूपमा मृत्युदण्ड हेर्न सक्नेछन् ।”
सन् २००९ मा १३ जनालाई गोली हानेको फोर्ट हुड, टेक्सासमा डिसेम्बर ३ का लागि निर्धारित हसनको मृत्युदण्ड सन् १९४५ पछि अमेरिकी सैन्य ‘फायरिङ स्क्वाड’ बाट हुने पहिलो मृत्युदण्ड हुनेछ ।
हेगसेथले गत साता लाइभ स्ट्रिम गर्ने योजना भएको पुष्टि गर्दै भन्नुभएको थियो, “हामी सुनिश्चित गर्नेछौँ कि मानिसहरूले हेर्न सकून्, यो सार्वजनिक होस् ।”
