विराटनगर, असोज १२ । विराटनगरको सीमावर्ती दरैया क्षेत्रमा भारतीय सीमा सुरक्षा बल (एसएसबी)ले एक नेपाली युवकलाई कुटपिट गरेको छ।

भारतबाट नेपालतर्फ आउने क्रममा एसएसबीसँग विवाद भएपछि विराटनगर महानगरपालिका–२ का २८ वर्षीय अनुज कामतले जवानतर्फ ढुंगा प्रहार गरेको बताइएको छ। त्यसपछि नेपालतर्फ भागेका कामतलाई एसएसबीले दशगजाबाट तानेर भारततर्फ लगी लाठीले कुटपिट गरेको थियो।

घटनाका बेला नेपाल प्रहरी र सशस्त्र प्रहरीसमेत घटनास्थलमा रहेको बताइएको छ। सामाजिक सञ्जालमा सार्वजनिक भिडियोमा एसएसबीले युवकलाई नियन्त्रणमा लिएर कुटपिट गर्दै भारततर्फ लगेको देखिन्छ।

एसएसबीले केही समय नियन्त्रणमा राखेपछि कामतलाई नेपाल प्रहरीको जिम्मा लगाएको थियो। इलाका प्रहरी कार्यालय रानीले उनलाई एक दिन नियन्त्रणमा राखी आइतबार श्रीमतीको रोहबरमा आफन्तको जिम्मा लगाएको जिल्ला प्रहरी कार्यालय मोरङका प्रवक्ता डीएसपी मकेन्द्रकुमार मिश्रले जानकारी दिए। प्रहरीले कामत लागुऔषध प्रयोगकर्ता रहेको र घटनाका बेला सामान्य अवस्थामा नरहेको जनाएको छ।