बागलुङ । केही दिनदेखि परेको अविरल वर्षाका कारण बागलुङ जिल्लाका विभिन्न क्षेत्रमा बाढी, पहिरो र घर भत्किने घटनाबाट ठूलो जनधनको क्षति भएको छ। जिल्ला प्रशासन कार्यालय बागलुङको विपद्सम्बन्धी विवरणअनुसार ९ जनाको मृत्यु, एक जना बेपत्ता भएका छन् भने १०/११ वटा घर भत्किएका छन्।
प्रशासनको विवरणअनुसार २०८३ असार ९ गते ताराखोला गाउँपालिका–५ मा अविरल वर्षाका कारण घर भत्किँदा एक जनाको मृत्यु भएको थियो।
त्यसैगरी, असार १० गते राति परेको अविरल वर्षाका कारण तमानखोला गाउँपालिका–३ मा पहिरोले घर भत्काउँदा दुई जनाको मृत्यु भएको छ। तमानखोला–४ मा बाढीका कारण थप दुई जनाको मृत्यु र एक जना बेपत्ता भएको प्रशासनले जनाएको छ। उक्त क्षेत्रमा १०/११ वटा घरसमेत भत्किएका छन्।
असार ११ गते निसीखोला गाउँपालिका–३ मा पहिरोले घर भत्काउँदा एउटै परिवारका चार जनाको मृत्यु भएको विवरणमा उल्लेख छ। यससँगै पछिल्ला घटनामा जिल्लामा मृत्यु हुनेको संख्या नौ पुगेको हो।
विपद् प्रभावित क्षेत्रमा उद्धार तथा राहत कार्यलाई तीव्रता दिइएको छ। तमानखोला गाउँपालिका–३ र ४ मा राहत तथा उद्धारका लागि प्रमुख जिल्ला अधिकारीको नेतृत्वमा जिल्ला सुरक्षा समितिका सदस्यसहितको टोली हेलिकप्टरमार्फत घटनास्थलतर्फ पठाइएको प्रशासनले जनाएको छ।
यता, बाढीका कारण बागलुङ नगरपालिका–९ मालढुंगास्थित बागलुङ–पर्वत जोड्ने मालढुंगा मोटरेबल पुलको पूर्वी भाग कालीगण्डकी नदीको बाढीले क्षति पुर्याएको छ। पुलको सम्बन्धित सडकसँगको सम्पर्क विच्छेद भएपछि यातायात सञ्चालन सहज बनाउन सडक डिभिजन कार्यालयसँग समन्वय गरी तत्काल मर्मतको पहल थालिएको छ।
अविरल वर्षाका कारण बागलुङ नगरपालिका लगायत जिल्लाका विभिन्न स्थानीय तहमा सञ्चार तथा विद्युत् सेवा प्रभावित, सडक अवरुद्ध तथा पहिरो खस्ने क्रम जारी रहेको प्रशासनको विवरणमा उल्लेख छ। राजमार्ग तथा सहायक मार्गमा अवरुद्ध सडक खुलाउन सडक डिभिजन र स्थानीय तहको समन्वयमा जेसीबी परिचालन गरी सडक सञ्चालनको प्रयास भइरहेको जनाइएको छ।
