काठमाडौँ । नेपाल नेत्रज्योति सङ्घले विश्व स्वास्थ्य सङ्गठन (डब्लुएचओ) दक्षिणपूर्वी एसिया क्षेत्रीय कार्यालयबाट दक्षिण पूर्वी एसिया क्षेत्रीय पब्लिक हेल्थ च्याम्पियन अवार्ड–२०२६ प्राप्त गरेको छ ।

दिली, तिमोर–लेस्तेमा भदौ २३ गते आयोजित डब्लुएचओ दक्षिण पूर्वी एसिया क्षेत्रीय कमिटीको उनासिऔँ बैठकमा सो विश्व प्रतिष्ठित सम्मान सङ्घलाई अर्पण गरिएको हो ।

डब्लुएचओका महानिर्देशक डा टेड्रोस अधानोन ग्याब्रियसले सङ्घका अध्यक्ष प्राडा चेतराज पन्तलाई उक्त सम्मान अर्पण गर्नुभयो ।

नेपालमा रोकथाम गर्न सकिने अन्धोपन न्यूनीकरण तथा सर्वसुलभ, समतामूलक र विपन्न, पहँुचबाट बाहिर रहेका समुदाय केन्द्रित नेत्र स्वास्थ्य सेवाको विस्तारमा अतुलनीय योगदान पुर्‍याएवापत डब्लुएचओले पहिलोपटक सङ्घलाई सो विधाको सम्मान अर्पण गरेको डब्लुएचओद्वारा जारी विज्ञप्तिमा उल्लेख छ ।

विज्ञप्तिका अनुसार सार्वजनिक स्वास्थ्य विधामा नेपाल नेत्रज्योति सङ्घसहित थाइल्यान्डका डा नित्ताया फानुफाक र भारतका डा के सुरेशकुमारलाई पनि सम्मान प्रदान गरिएको छ ।

अन्धोपन न्यूनीकरण गर्न निरन्तरता

सङ्घका महासचिव भरतबहादुर चन्दका अनुसार सङ्घले हालसम्म पाँच करोड दुई लाख चार सय ८९ जनालाई आँखा उपचार सेवा प्रदान गरिसकेको छ भने ५६ लाख ५९ हजार छ सय २४ जनाको आँखाको शल्यक्रियासमेत गरिसकेको छ । सङ्घको हाल २८ आँखा अस्पताल, ४४ जिल्ला शाखाका दुई सय २६ आँखा उपचार केन्द्रमार्फत नेपालीसहित अन्य विभिन्न विदेशी नागरिकलाई आँखा सेवा प्रदान गरिरहेको छ ।

सङ्घका कार्यकारी निर्देशक डा शैलेशकुमार मिश्रले भने– ‘नेपाल नेत्रज्योति सङ्घले समुदायको सहभागिता, साझेदारी र स्थानीय आवश्यकतामा आधारित सेवामार्फत सबैका लागि गुणस्तरीय आँखा स्वास्थ्य सेवामा पहुँच सुनिश्चित गर्ने उद्देश्यका साथ काम गर्दै आएको छ ।’

डब्लुएचओका अनुसार नेपालमा अन्धोपनको अवस्था सन् १९८१ मा ०.८४ प्रतिशत रहेकोमा सन् २०२०/२१ सम्ममा घटेर ०.२८ प्रतिशत मा पुगेको छ । डब्लुएचओ दक्षिणपूर्वी एसिया क्षेत्रीय कार्यालयका अनुसार यस वर्ष सार्वजनिक स्वास्थ्य क्षेत्रका लागि एक सय दुई मनोनयन परेका थिए । सार्वजनिक स्वास्थ्यमा प्रभाव, नवीनता, विस्तारयोग्यता, दिगोपन र समतामूलक पहुँचलगायतका आधारमा वरिष्ठ डब्लुएचओ विज्ञ सम्मिलित छनोट समितिले मूल्याङ्कन गरी अवार्डका प्राप्तकर्ताहरू छनोट गरिएको थियो ।

सङ्घका महासचिव चन्दका अनुसार सङ्घले यस अवार्डलाई सङ्घसँग आबद्ध चिकित्सक, स्वास्थ्यकर्मी, कर्मचारी, स्वयम्सेवक, जिल्ला शाखा, आँखा अस्पताल तथा आँखा उपचार केन्द्र, नेपाल सरकार, प्रदेश सरकार, स्थानीय सरकार, विकास साझेदार, दातृ संस्था, स्थानीय समुदाय तथा सम्पूर्ण शुभेच्छुकको सामूहिक योगदानको सम्मानका रूपमा लिएको छ ।

अर्काेतर्फ सङ्घले गत आवमा विदेशी बिरामीमार्फत एक अर्ब ५० करोडभन्दा बढी विदेशी मुद्रा भित्र्याएको छ । यसबाट स्वास्थ्य पर्यटनमा नयाँ सम्भावनाको ढोका समेत खुलेको जनाइएको छ ।