काठमाडौँ । विभिन्न मिडिया हाउस तथा नेपाली कङ्ग्रेसका नेताको घरअगाडि राखिएका शङ्कास्पद गाडीमध्ये एउटा गाडी सत्तारूढ रास्वपाकै पूर्व केन्द्रीय सदस्यको भएको खुलेपछि रास्वपाले नै स्पष्टीकरण दिएको छ तर त्यो स्पष्टीकरण आफ्ना केन्द्रीय सदस्यको बारेमा नभएर स्वतन्त्र र भयरित पत्रकारिताको बारेमा छ ।
२०८३ असार २९ गते सोमबार महामन्त्री विपिनकुमार आचार्यले विज्ञप्ति जारी गर्दै कुनै पनि बहानामा सूचना तथा सञ्चार स्वतन्त्रता हनन् गर्ने, सञ्चारगृहमा त्रासको वातावरण सिर्जना गर्ने र चौथो अङ्गलाई सङ्कुचित पार्न खोज्ने जुनसुकै प्रवृत्ति वा अवाञ्छित क्रियाकलाप आफूलाई स्वीकार्य नभएको बताइए ।
पार्टीले यस्ता शङ्कास्पद गतिविधिमा संलग्न जोसुकै भए पनि उनीहरूको तत्काल पहिचान गरी कानुनबमोजिम गर्न नेपाल सरकार, गृहमन्त्रालय र सम्बन्धित सुरक्षा निकायको ध्यानाकर्षण गराइएको बताइएको छ ।
सो वक्तव्य दिइरहँदा आफ्ना पूर्व केन्द्रीयि सदस्य रवि जयसवालको बारेमा भने केही बताइएको छैन ।
सोमबार बिहानै ७ बजेदेखि अनलाइन खबर डट कम, कान्तिपुर पब्लिकेसन, हिमालय टेलिभिजन र नेपाली कङ्ग्रेसका सभापति गगन थापाको घरअगाडि शङ्कास्पद गाडी देखा परेका थिए ।
प्रहरीले ती गाडी क्रेनको मदतबाट उठाइसकेको छ । यसबारे थप अनुसन्धान भइरहेको जिल्ला प्रहरी परिसर काठमाडौंका एसपी पवन भट्टराईले जानकारी दिए ।
एउटा गाडी रास्वपा केन्द्रीय सदस्यको
उक्त गाडीका बारेमा दिनभरि छानबिन हुँदा कान्तिपुर पब्लिकेसन्सको गेटमा शङ्कास्पद रूपमा छाडिएको बा ०१–०३४ च ८४८० नम्बरको गाडी रास्वपाका नेता रवि जयसवालले चढ्ने गरेको खुलेको थियो ।
उक्त गाडी भर्खरै जयसवालले ज्योति कन्सर्नको नाममा बुकिङ गरेको तर बिक्रेता एसटी मोटर्सको नामबाट नामसारी नभइसकेको भेटिएको हो ।
जयसवाल रौतहटका गरुडा नगरपालिकाका प्रमुख कन्थमणि प्रसाद कलवार (जयसवाल) का छोरा हुन् । मेयर कन्थमणिले उक्त नम्बरप्लेट (बा ०१–०३४ च ८४८०) को गाडी आफ्नो छोराले एक महिनाअघि देखि चढ्ने गरेको तर अहिलेसम्म पास गरिनसकेको बताए ।
रास्वपाले गत जेठ ८ गते रविलाई केन्द्रीय अनुसन्धान तथा अभिलेखीकरण विभागको सदस्यमा मनोनित गरेको थियो । उनलाई रास्वपाका तत्कालीन महामन्त्री भूपदेव शाहले मनोनित गरेका थिए ।
पत्रकार महासङ्घको स्थलगत अनुगमन
बिहानैदेखि काठमाडौँका केही सञ्चारगृह र पत्रकारका सवारीसाधन अवरोध गर्ने उद्देश्यले शङ्कास्पद रूपमा गाडी देखिएपछि नेपाल पत्रकार महासङ्घले स्थलगत अध्ययन गरेको थियो ।
स्थलगत अध्ययनमा महासङ्घकी अध्यक्ष निर्मला शर्मा, वरिष्ठ उपाध्यक्ष दीपक आचार्य र सचिव रमेश खतिवडाको टोली सहभागी थियो ।
यसै क्रममा महासङ्घका महासचिव रामप्रसाद दाहालले प्रेसविज्ञप्ति जारी गर्दै शङ्कास्पद गाडी पार्किङको घटनालाई प्रेस स्वतन्त्रताको घटनासँग जोड्दै सो घटनाको भत्र्सना गरिएको थियो ।
