काठमाडौँ । नेकपा (मसाल) ले भारतको चेन्नै नगर समितिमा रहनुभएका धर्मराज शर्मा (टेक नाम कपिल) को निधनप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८३ असार २७ गते शनिबार शोकवक्तव्य जारी गर्र्दै पार्टीले श्रद्धाञ्जली र शोकसन्तप्त परिवारप्रति समवेदना व्यक्त गरेको हो ।
मूल प्रवाह अखिल भारत नेपाली एकता समाजका विभिन्न समितिमा रहेर काम गर्नुभएका शर्माको निधनबाट पार्टीको आन्दोलनमा गम्भीर क्षति पुगेको बताइएको उक्त शोकवक्तव्यको पूर्ण पाठ यस्तो छ :
“बागलुङ जिल्ला जैमिनी नगरपालिका–१० निवासी कामरेड धर्मराज शर्मा (का. कपिल) को २०८३ असार २६ तदानुसार जुलाई १०, २०२६ गते भारतको चेन्नईमा हृदयघातका कारण ६५ वर्षको उमेरमा मृत्यु भएको छ । हामीले उहाँको मृत्युप्रति गहिरो दुःख व्यक्त गर्दै सन्तप्त परिवारजनप्रति हार्दिक समवेदना प्रकट गर्दछौँ ।
कामरेड धर्मराज शर्मा रोजगारीको सिलसिलामा लामो समयदेखि भारतमा रहँदै आउनुभएको थियो । उहाँ हाम्रो पार्टीको सदस्य हुनुहुन्थ्यो । उहाँले पार्टी र मूल प्रवाहका विभिन्न तहमा रहेर राजनीतिक तथा सामाजिक भूमिका निर्वाह गर्दै आउनुभएको थियो । पछिल्लो समयमा उहाँ हाम्रो पार्टीको नगर समिति सदस्यमा रहेर जिम्मेवारी निर्वाह गरिरहनु भएको थियो । उहाँ हाम्रो पार्टीको इमान्दार, जुझारु र अनुशासित सदस्य हुनुहुन्थ्यो । उहाँको मृत्युबाट हाम्रो पार्टीको आन्दोलनमा गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
