थम्मन थापा
बागलुङ, असार २५
गत असार १२ गते करेन्ट लागेर मृत्यु भएकी गलकोट नगरपालिका–३, हटिया बौराचौतारा निवासी स्वर्गीय हेमकला भण्डारीका परिवारलाई गलकोट नगरपालिकाले रु. ५० हजार आर्थिक सहयोग प्रदान गरेको छ।
गलकोट नगरपालिकाका प्रमुख भरत शर्मा गैरेले स्वर्गीय भण्डारीको निवासमै पुगेर उक्त रकम परिवारलाई हस्तान्तरण गर्नुभएको हो। स्वर्गीय भण्डारीका श्रीमान, तीन छोरी र एक छोरा रहेका छन्।
आर्थिक सहयोग हस्तान्तरण गर्दै नगरप्रमुख गैरेले स्वर्गीय भण्डारीप्रति भावपूर्ण श्रद्धाञ्जली व्यक्त गर्नुभयो। उहाँले दुःखको घडीमा नगरवासीको साथमा स्थानीय सरकार सधैं रहने प्रतिबद्धता व्यक्त गर्दै विपद् र पीडामा परेको परिवारलाई आवश्यक सहयोग गर्न नगरपालिका प्रतिबद्ध रहेको बताउनुभयो।
कार्यक्रममा गलकोट नगरपालिका–३ का वडा अध्यक्ष फमबहादुर खत्री, वडा सचिव चन्द्रबहादुर श्रीस तथा नगर कार्यपालिका सदस्य टुककुमारी श्रेष्ठको उपस्थिति रहेको थियो।
स्वर्गीय भण्डारीको गत असार १२ गते गलकोट नगरपालिका–७, बाह्रमुरीमा आफ्नी दिदीको खेतमा धान रोप्ने क्रममा खेतमा रहेको फलामको पोलमा विद्युत् प्रवाह भएपछि करेन्ट लागेर घटनास्थलमै मृत्यु भएको थियो। उहाँ ५२ वर्षकी हुनुहुन्थ्यो।
