काठमाडौँ । नेकपा (मसाल) ले सरकारको नागरिकप्रतिको अनुत्तरदायी क्रियाकलापको परिणामस्वरूप गणेश नेपालीको आत्मदाह भएको धारणा व्यक्त गरेको छ ।
प्रवक्ता रामप्रकाश पुरीको हस्ताक्षरमा २०८३ असार २६ गते शुक्रबार प्रेसवक्तव्य जारी गर्दै मसालले सो धारणा व्यक्त गरेको हो ।
मृतक नेपालीको निधनप्रति गम्भीर दु:ख तथा श्रद्धाञ्जली व्यक्त गर्दै मसालले यस प्रकारको घटनाप्रति गृहमन्त्री सुधन गुरुङ जिम्मेवार रहेको बताएको छ ।
सरकारले वैशाख १२ गतेदेखि सुकुम्बासी हटाउँदा कतिपय सुकुम्वासीले आत्महत्या गरेको तथा अहिले पुन: सोही सरकार रहेका बेला गणेश नेपालीको आत्मदाहको घटना अगाडि आउनुलाई मसालले सरकारको कुरूप शासनको परिणामको रूपमा किटानी गरेको छ ।
यस्तो छ, प्रेसवक्तव्यको पूर्ण पाठ :
“काठमाडौँको त्रिपुरेश्वरस्थित राहदानी विभागअगाडि मुगुका गणेश नेपालीले गरेको आत्मदाहप्रति हाम्रो पार्टीको गम्भीर ध्यान आकर्षित भएको छ । उनको मृत्युप्रति हामीले गम्भीर दु:ख व्यक्त गर्दै मृतकप्रति हार्दिक श्रद्धाञ्जली व्यक्त गर्दछौँ ।
गणेश नेपालीको आत्मदाहबाट भएको मृत्यु कुनै सामान्य प्रकारको मृत्यु होइन, यसले देशको कुशासन, हत्याहिंसा र राज्य सञ्चालनको चरम असफलताको तस्बिरलाई गम्भीर रूपले प्रस्तुत गर्दछ । सरकारले सञ्चालन गरिरहेको प्रशासनले नागरिक जीवनमाथि पारेको गम्भीर नकारात्मक प्रभावको रूपमा यस प्रकारका घटना बारम्बार सतहमा आउने गरेका छन् । नागरिकप्रति अनुत्तरदायी प्रशासनिक क्रियाकलापले यस प्रकारको गम्भीर समस्यालाई पैदा गरेको कुरामा शङ्का छैन ।
यस घटनाका लागि सरकार र त्यसको गृहमन्त्री पनि गम्भीर रूपमा जिम्मेवार रहेका छन् । उनीहरूको अनुत्तरदायी प्रशासनिक शैलीले यस प्रकारका घटना दोहोरिँदै जाने निश्चित छ । पहिले अहिलेकै सरकार हुँदा सुकुम्बासी विरुद्ध चलाइएको अभियानको बेलामा कतिपय सुकुम्बासीले गरेको आत्महत्याका प्रकरण र अहिले उनै सरकार कायम रहेकै बेला गणेश नेपाली आत्महत्याको घटना अगाडि आएको छ । यी घटनाले सरकारको ुशासनको कुरूप पक्षलाई गम्भीर रूपमा उजागर गरेका छन् । हामीले सरकारको कुशासनको कडा शब्दमा विरोध गर्दछौँ ।”
