सन्तोषकुमार गुप्ता, देउखुरी ।
दाङको लमहीमा १४ वर्षीया नाबालिगमाथि जबरजस्ती करणी गरेको आरोपमा पक्राउ परेका एक युवकलाई अदालतबाट म्याद थप गरी प्रहरीले अनुसन्धान अघि बढाएको छ ।
जिल्ला प्रहरी कार्यालय दाङका अनुसार शान्तिनगर गाउँपालिका–३ भलटोलाका २६ वर्षीय प्रकाश काफ्लेलाई अदालतबाट म्याद थप अनुमति लिएर जबरजस्ती करणीसम्बन्धी कसुरमा अनुसन्धान भइरहेको हो ।
प्रहरीका अनुसार असार ४ गते राति करिब ८ बजे लमही नगरपालिका–५ रातोडाँडास्थित आफ्नै डेरा कोठामा आरोपितले १४ वर्षीया नाबालिगलाई ललाइफकाइ कोठाभित्र लगी इच्छा विपरीत जबरजस्ती करणी गरेको आरोप लागेको हो ।
घटनापछि आरोपितले नाबालिगलाई राजपुर गाउँपालिका–५ सालभौरी टोलमा छाडेर फरार भएको प्रहरीले जनाएको छ ।
घटनाको भोलिपल्ट पीडित पक्षबाट इलाका प्रहरी कार्यालय लमहीमा जाहेरी परेपछि तत्कालीन प्रहरी निरीक्षक रोशनराज पाण्डेयको कमान्डमा खटिएको पाँच सदस्यीय टोलीले आरोपितलाई नियन्त्रणमा लिएको थियो ।
पक्राउ परेका आरोपित तथा पीडित दुवैलाई विस्तृत स्वास्थ्य परीक्षणका लागि राप्ती स्वास्थ्य विज्ञान प्रतिष्ठान घोराही पठाइएको थियो । पीडित नाबालिकाको स्वास्थ्य अवस्था सामान्य रहेको प्रहरीले जनाएको छ ।
घटनास्थल इलाका प्रहरी कार्यालय लमहीबाट करिब एक किमि पश्चिममा पर्ने जिल्ला प्रहरी कार्यालय दाङले जनाएको छ । प्रहरीले घटनाका सम्बन्धमा थप प्रमाण सङ्कलन तथा अनुसन्धान कार्य जारी रहेको जनाएको छ ।
