कपिलवस्तु । नेपाल प्रहरीका अनुसार कपिलवस्तुको महाराजगञ्ज नगरपालिका–२ गैडहवास्थित हुलाकी सडकखण्डमा यात्रुवाहक बस दुर्घटना हुँदा २२ जना घाइते भएका छन्।
धनगढीबाट काठमाडौंतर्फ जाँदै गरेको सुदूरपश्चिम प्रदेश ०१–००१ ख ३७२१ नम्बरको शिवपुरी लक्जरी कोच प्रालिद्वारा सञ्चालित बस अनियन्त्रित भई सडकको डिभाइडरमा ठोक्किएपछि पल्टिएको प्रहरीले जनाएको छ।
दुर्घटनामा बस चालक कैलाली धनगढी उपमहानगरपालिका–१३ गेटाका ४२ वर्षीय हरीसिंह महरासहित २२ जना यात्रु घाइते भएका छन्। घाइतेमध्ये अधिकांशको टाउको, हात, खुट्टा, छाती, कम्मर तथा शरीरका विभिन्न भागमा चोट लागेको नेपाल प्रहरीले जनाएको छ।
प्रहरीका अनुसार घाइतेहरूलाई तत्काल उद्धार गरी जिल्ला अस्पताल तौलिहवामा प्रारम्भिक उपचार गरिएको थियो। उपचारपश्चात् थप उपचार आवश्यक देखिएकाले सबै घाइतेलाई मेडिकल कलेज भैरहवा रिफर गरिएको छ।
दुर्घटनाका बेला बसमा चालकसहित ४६ जना सवार रहेका थिए। घाइते नभएका २४ यात्रुलाई अर्को सवारी साधनमार्फत गन्तव्यतर्फ पठाइएको प्रहरीले जानकारी दिएको छ।
दुर्घटनापछि पल्टिएको बसलाई क्रेनको सहायताले हटाइएपछि अवरुद्ध सडक दुवैतर्फ सञ्चालनमा आएको छ। बस चालक प्रहरी नियन्त्रणमा रहेका छन् भने घटनाको कारणबारे थप अनुसन्धान भइरहेको नेपाल प्रहरीले जनाएको छ।
