बुटवल, १४ असार । दशकौँदेखि सीमा विवाद, नागरिकताविहीनता र राज्यको बेवास्ता झेल्दै आएका नवलपरासीको सुस्तावासीले सीमासम्बन्धी प्रधानमन्त्रीको अभिव्यक्तिपछि भारतीय सुरक्षाकर्मीबाट थप त्रास र असुरक्षा महसुस गर्नुपरेको बताएका छन्।
बुटवलमा आइतबार आयोजित पत्रकार सम्मेलनमा सुस्ता बचाउ अभियान र सुस्ता बचाउ युवा अभियानले सीमा समस्या समाधान, नागरिकता वितरण र भूमि अतिक्रमण रोक्न सरकारसँग तत्काल कूटनीतिक पहल गर्न माग गरेका छन्। सरकारबाट आफ्ना मागप्रति बेवास्ता भएको भन्दै उनीहरूले छिट्टै काठमाडौंको माइतीघर मण्डलामा धर्ना दिने चेतावनी दिएका छन्।
स्थानीयवासीका अनुसार सुस्ताका करिब १२० परिवार अझै नागरिकताविहीन छन्। नागरिकता नहुँदा शिक्षा, स्वास्थ्य, रोजगारी तथा अन्य सरकारी सेवाबाट वञ्चित हुनुपरेको उनीहरूको गुनासो छ। साथै, नागरिकता अभावकै कारण भारतीय पक्षले नेपाली भूमि अतिक्रमण गर्न सहज भएको उनीहरूको भनाइ छ।
अभियानका प्रतिनिधिहरूले गत २९ जेठमा भारतीय सीमा सुरक्षा बल (एसएसबी) सुस्ता क्षेत्रमा प्रवेश गरी स्थानीयलाई त्रसित बनाएको आरोप लगाएका छन्। उनीहरूले नारायणी नदी किनारमा भइरहेको कटान नियन्त्रण कार्यमा भारतीय पक्षले अवरोध गरेको तथा भारतीय वन विभागले तारबार निर्माण गरिरहेको दाबी गर्दै यसप्रति नेपाल सरकारले प्रभावकारी प्रतिक्रिया नजनाएको बताएका छन्।
सुस्ता बचाउ अभियानका अनुसार सरकारी अभिलेखमा करिब ४० हजार ९८० हेक्टर नेपाली भूमि रहेको सुस्तामा हाल करिब ७ हजार हेक्टर मात्रै नेपालीको भोगचलनमा छ। अभियानले भूमि अतिक्रमण रोक्न, नागरिकता वितरण गर्न, जग्गाको नापजाँच गरी लालपुर्जा उपलब्ध गराउन, सीमा सुरक्षा सुदृढ बनाउन तथा आधारभूत सेवाको पहुँच सुनिश्चित गर्न सरकारसँग माग गरेको छ।
अभियानले सुस्ताको सीमा विवादको स्थायी समाधान र स्थानीय बासिन्दाको अधिकार संरक्षणका लागि विषयलाई उच्च प्राथमिकतामा राखी तत्काल ठोस कदम चाल्न सरकारसँग आग्रह गरेको छ।
