काठमाडौँ । नेकपा (मसाल) ले तराई मधेस जनवादी मोर्चाका केन्द्रीय सदस्य इन्दलप्रसाद केवटको निधनप्रति श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा २०८३ असार १४ गते आइतबार शोकवक्तव्य जारी गर्दै श्रद्धाञ्जली तथा सन्तप्त परिवारप्रति समवेदना व्यक्त गरेको हो ।
तमजमो, राष्ट्रिय जनमोर्चालगायत विभिन्न मोर्चाका जिम्मेवारी सम्हालेका केवटको निधनबाट मसालको आन्दोलनमा अपूरणीय क्षति पुगेको बताइएको उक्त शोकवक्तव्यको पूर्ण पाठ यस्तो छ :
“रुपन्देही जिल्ला रोहिणी गाउँपालिका–५ निवासी कामरेड इन्दलप्रसाद केवट (का. कैलास) को ७३ वर्षको उमेरमा २०८३ असार १३ गते मृत्यु भएको छ । उहाँको मृत्युप्रति गहिरो दुःख व्यक्त गर्दै सन्तप्त परिवारजन तथा रुपन्देही जिल्लाका सम्पूर्ण पार्टीसदस्यप्रति हार्दिक समवेदना तथा सहानुभूति प्रकट गर्दछौँ ।
कामरेड इन्दलप्रसाद केवट हाम्रो पार्टीको इमानदार, कर्तव्यनिष्ठ, अनुशासित र अत्यन्त स्वच्छ छवि भएको सदस्य हुनुहुन्थ्यो । तराई मधेसका जनसमुदायमा उहाँ आदरणीय व्यक्तित्वको रूपमा स्थापित हुनुहुन्थ्यो । उहाँ हाम्रो पार्टीको रुपन्देही जिल्लाको सल्लाहकार हुनुहुन्थ्यो । उहाँले हाम्रो पार्टीका विभिन्न जनवर्गीय मोर्चाका विभिन्न तहमा रहेर जिम्मेवारी सम्हाल्नुभएको थियो । त्यस क्रममा उहाँले तराई मधेस जनवादी मोर्चाको केन्द्रीय उपाध्यक्षको भूमिकामा रहेर सक्रिय भूमिका निर्वाह गर्नुभएको थियो । पछिल्लो समयमा उहाँ उक्त मोर्चाको रुपन्देही जिल्लाको अध्यक्षमा कार्यरत हुनुहुन्थ्यो । उहाँको मृत्युबाट हाम्रो पार्टीको आन्दोलनका साथै रुपन्देही जिल्लाको कम्युनिस्ट आन्दोलनमा अपूरणीय क्षति हुन गएको छ ।
अन्तमा हामीले कामरेड इन्दलप्रसाद केवटप्रति हार्दिक श्रद्धाञ्जली व्यक्त गर्दछौँ ।”
