बुटवल । तराई मधेस जनवादी मोर्चाका केन्द्रीय सदस्य इन्दल केवटको निधन भएको छ ।
क्यान्सर रोगका कारण २०८३ असार १३ गते शनिबार दिउसो उहाँको निधन भएको हो ।
७३ वर्षीय केवटको दाहसंस्कार असार १३ गते नै रुपन्देही जिल्लाको रोहिणी गाउँपालिका–५ तर्कुलहास्थित घाटमा गरिएको थियो ।
घाटमा राजमो अध्यक्ष चित्रबहादुर केसीले उहाँको पार्थिक शरीरमा पार्टीको झन्डा ओढाउनुभएको थियो ।
दाहसंस्कार स्थलमा तमजमो अध्यक्ष बद्रे आलम, कम्युनिस्ट सङ्ग्रहालयका अध्यक्ष चेतनाथ आचार्य, राजमो सिद्धार्थनगर नगर समितिका सदस्य रामकिसन बानिया र हेमन्तदास कुर्मी, राजमो रोहिणी पालिका समितिका सानोओरी केवट र रज्जाक हुसेन, राष्ट्रिय प्रजातन्त्र पार्टीका सांसद ताहिर अली, पूर्व सांसदहरू प्रमोद यादव र घनश्याम यादवलगायत परिवार र गाउँवासीको उपस्थिति रहेको थियो ।
स्मृतिशेष इन्दल युवाअवस्थादेखि नै अन्याय, अत्याचारका विरुद्ध निरन्तर सङ्घर्ष गर्दै आउनुभएका इमानदार, समाजसेवी जुझारु व्यक्तित्व हुनुहुन्यो ।
तमजमोका पूर्व केन्द्रीय उपाध्यक्ष तथा अखिल नेपाल किसान महासङ्घ (अप्फा) रुपन्देहीका पूर्व अध्यक्ष रहिसक्नुभएका केवटले मसालसम्बद्ध विभिन्न मोर्चामा रही सक्रिय भूमिका निर्वाह गर्नुभएको थियो ।
तमजमो अध्यक्ष आलमका अनुसार पछिल्लो तीन महिनादेखि उहाँमा पेटको क्यान्सर देखा परेको थियो । त्यसको उपचार भरतपुर क्यान्सर अस्पतालमा चलिरहेको थियो । गत जेठ २२ गते उहाँको पहिलो किमो लगाइएको थियो भने असार १४ गते दोस्रो किमो लगाउने योजना थियो । दोस्रो किमोभन्दा अगाडि नै उहाँको निधन भएको थियो ।
