काठमाडौँ । अखिल नेपाल जनजाति सम्मेलनले प्युठान स्वर्गद्वारी नगरपालिकाका उपप्रमुखसमेत रहनुभएका केन्द्रीय सल्लाहकार मीनराज रानामगरको असामयिक निधनप्रति श्रद्धाञ्जली व्यक्त गरेको छ ।
केन्द्रीय अध्यक्ष निमबहादुर बुढाथोकीको हस्ताक्षरमा २०८३ असार १३ गते शनिबार शोकवक्तव्य जारी गर्दै जनजाति सम्मेलनले रानाप्रति श्रद्धाञ्जली तथा शोकसन्तप्त परिवारप्रति समवेदना व्यक्त गरेको हो ।
शोकवक्तव्यमा भनिएको छ– “हाम्रो सङ्गठन अखिल नेपाल जनजाति सम्मेलनका केन्द्रीय सल्लाहकार मीनराज रानामगरको आजै प्युठानको बाङ्गेसल्लामा सडक दुर्घटनामा परी असामयिक निधन भएको दुखद समाचारबाट हामी स्तब्ध र दुखित भएका छौँ । प्युठानको स्वर्गद्वारी नगरपालिकाका उपप्रमुखसमेत रहनुभएका रानाको निधनप्रति हाम्रो सङ्गठन भावपूर्ण श्रद्धाञ्जली व्यक्त गर्दछौँ, साथै शोकसन्तप्त परिवारप्रति समवेदना व्यक्त गर्दछौँ ।
नेपालको आदिवासी तथा जनजाति आन्दोलनमा रानाको महत्त्वपूर्ण योगदान रहेको थियो । सोही योगदानको आधारमा गत वर्ष २०८२ असोज २६ र २७ गते चितवनमा सम्पन्न पाँचौँ राष्ट्रिय महाधिवेशनले उहाँलाई केन्द्रीय सल्लाहकारमा चयन गरेको थियो । उहाँको निधनबाट हाम्रो सङ्गठन र आन्दोलनलाई गम्भीर क्षति पुगेको छ ।
अन्तमा उहाँप्रति पुन: भावपूर्ण श्रद्धाञ्जली व्यक्त गर्दछौँ ।”
