काठमाडौं, १२ असार । कालीमाटी फलफूल तथा तरकारी बजार विकास समितिले आजका लागि कृषिउपजको अधिकतम थोक मूल्य सार्वजनिक गरेको छ।
समितिका अनुसार गोलभेँडा ठूलो (नेपाली) प्रतिकिलो ६० रुपैयाँ, गोलभेँडा सानो (लोकल) १० रुपैयाँ, गोलभेँडा सानो (टनेल) २० रुपैयाँ तथा रातो आलु ३० देखि ३८ रुपैयाँ प्रतिकिलो कायम गरिएको छ। सुकेको भारतीय प्याज प्रतिकिलो ५२ रुपैयाँ निर्धारण गरिएको छ।
तरकारीतर्फ गाजर (लोकल) प्रतिकिलो १०० रुपैयाँ, बन्दा ६० रुपैयाँ, काउली १२० रुपैयाँ, रातो मूला ३० रुपैयाँ, सेतो मूला २० रुपैयाँ तथा भन्टा २० देखि ३० रुपैयाँ प्रतिकिलो तोकिएको छ।
यसैगरी बोडी, घिउ सिमी, करेला, लौका, चिचिण्डो, घिरौँला, फर्सी, भिन्डी, सखरखण्ड, पिँडालु र इस्कुसलगायतका तरकारीको मूल्य प्रतिकिलो ३० रुपैयाँदेखि १२० रुपैयाँसम्म निर्धारण गरिएको समितिले जनाएको छ।
हरियो सागसब्जीतर्फ रायोको साग प्रतिकिलो ४० रुपैयाँ, पालुङ्गो ६० रुपैयाँ, तोरीको साग ५० रुपैयाँ, हरियो प्याज १५० रुपैयाँ तथा विभिन्न प्रकारका च्याउको मूल्य २८० रुपैयाँदेखि १ हजार रुपैयाँ प्रतिकिलोसम्म कायम गरिएको छ।
फलफूलतर्फ फुजी स्याउ प्रतिकिलो ३०० रुपैयाँ, नेपाली केरा प्रतिदर्जन २५० रुपैयाँ, मालभोग केरा २०० रुपैयाँ, कागती २०० रुपैयाँ, अनार ४२० रुपैयाँ, आँप ९० देखि १०० रुपैयाँ तथा जुनार २३० रुपैयाँ प्रतिकिलो निर्धारण गरिएको छ। त्यसैगरी नासपाती, मेवा, लिची, नरिवल, तरबुजा र काँक्रोलगायतका फलफूलको मूल्य पनि सार्वजनिक गरिएको छ।
मसलाजन्य वस्तुतर्फ अदुवा प्रतिकिलो १४० रुपैयाँ, सुकेको खुर्सानी ५०० रुपैयाँ, अकबरे खुर्सानी ३०० रुपैयाँ, हरियो धनियाँ १५० रुपैयाँ तथा लसुन १८० रुपैयाँदेखि २२० रुपैयाँ प्रतिकिलोसम्म कायम गरिएको छ।
त्यसैगरी ताजा माछाको मूल्य प्रतिकिलो २५० रुपैयाँदेखि ३४० रुपैयाँसम्म र सुकेको माछा प्रतिकिलो १ हजार रुपैयाँ निर्धारण गरिएको समितिले जनाएको छ।
