ला गुआइरा (भेनेजुएला), १२ असार । उत्तरी भेनेजुएलामा बुधबार राति एक मिनेटभन्दा कम समयको अन्तरालमा आएका दुई शक्तिशाली भूकम्पका कारण व्यापक जनधनको क्षति भएको छ। कम्तीमा २३५ जनाको मृत्यु भएको छ भने करिब चार हजार ३०० जना घाइते भएका छन्। भग्नावशेषमुनि अझै पनि धेरै मानिस फसेको आशङ्का गरिएकाले उद्धार कार्य तीव्र पारिएको छ।
संयुक्त राज्य अमेरिकाको भूगर्भीय सर्वेक्षणका अनुसार ७.२ र ७.५ म्याग्निच्युडका दुई भूकम्पका कारण उत्तरी भेनेजुएलाका धेरै भवन भत्किएका, चर्किएका तथा ढलेका छन्। बिहीबारसम्म पनि शक्तिशाली परकम्पहरू महसुस भइरहेका छन्।
स्वास्थ्यमन्त्री कार्लोस अल्भाराडोले मृतकको सङ्ख्या २३५ पुगेको जानकारी दिनुभएको छ। उहाँका अनुसार घाइतेहरूको सङ्ख्या निरन्तर बढिरहेको छ भने केहीको अवस्था गम्भीर रहेको छ।
सबैभन्दा बढी प्रभावित ला गुआइरा राज्यका विभिन्न क्षेत्रमा उद्धारकर्मी र स्थानीय बासिन्दा भग्नावशेष हटाएर जीवित व्यक्तिको खोजीमा जुटेका छन्। धेरै स्थानमा पर्याप्त उपकरण तथा दक्ष जनशक्तिको अभाव देखिएको छ।
काराकासको उत्तरस्थित एक बस्तीमा एक युवती घण्टौँसम्म उद्धारको प्रतीक्षा गर्दै सहयोगका लागि चिच्याइरहेकी थिइन्। स्थानीय बासिन्दा डानी रिजोले उद्धार टोली र सुरक्षाकर्मीको तत्काल आवश्यकता रहेको बताउनुभएको थियो। केही समयपछि ती युवतीको मृत्यु भएको स्थानीयवासीले जानकारी दिएका छन्।
ला गुआइराका अन्य क्षेत्रमा पनि भग्नावशेषभित्रबाट मानिसहरूको आवाज सुनिएको छ। स्थानीय बासिन्दा एन्टोनियो बर्मुडेजले आवश्यक उपकरण तथा उद्धार सामग्रीको अभावका कारण आफूहरू असहाय बनेको बताउनुभयो।
डोमिङ्गो लुसियानी अस्पतालका एक चिकित्सकले नाम सार्वजनिक नगर्ने सर्तमा धेरै बालबालिका अभिभावकविहीन अवस्थामा अस्पताल पुगिरहेको जानकारी दिनुभयो। केही बालबालिकाले आफ्नो परिचय दिन सकेका छन् भने केहीलाई हातमा पहिचान पट्टी बाँधेर एम्बुलेन्समार्फत अस्पताल ल्याइएको छ।
एक उद्धारकर्मीले प्रशिक्षित जनशक्ति र आधुनिक उपकरणको अभावका कारण उद्धार अभियान प्रभावित भएको बताउनुभयो। प्रभावित क्षेत्रलाई विपद् क्षेत्र घोषणा गरिएपछि अन्तरिम राष्ट्रपति डेल्सी रोड्रिग्जले ला गुआइराको स्थलगत निरीक्षण गर्नुभएको छ।
यसबीच केही स्थानमा खाद्यान्न तथा दैनिक उपभोग्य सामग्री बिक्री गर्ने पसलमा लुटपाटसमेत भएको एएफपीका पत्रकारहरूले जनाएका छन्। भेनेजुएलाको अन्तर्राष्ट्रिय उद्धार समितिकी निर्देशक निकोल कास्टले अवस्थालाई अत्यन्तै विनाशकारी भएको बताउनुभएको छ।
भूकम्पपछि विश्वका विभिन्न देशले सहयोगको प्रतिबद्धता जनाएका छन्। स्विट्जरल्यान्ड, स्पेन, फ्रान्स, पोर्चुगल तथा मेक्सिकोले विशेषज्ञसहित उद्धार टोली पठाउने घोषणा गरेका छन्।
संयुक्त राज्य अमेरिकाले दुई युद्धपोत, यातायात विमान तथा हेलिकप्टर परिचालन गर्नुका साथै १५ करोड अमेरिकी डलर बराबरको सहायता उपलब्ध गराउने जनाएको छ। अमेरिकी विदेशमन्त्री मार्को रुबियोले आफ्नो देशको प्रतिक्रिया तीव्र, प्रभावकारी र व्यापक हुने बताउनुभएको छ।
जनवरीमा अमेरिकी सेनाको हस्तक्षेपपछि राष्ट्रपति निकोलस मदुरोलाई सत्ताच्युत गरी पक्राउ गरिएसँगै भेनेजुएलामा वासिङ्टनको प्रभाव बढेको छ।
चीन, भारत, ब्राजिल तथा युद्धग्रस्त इरानले पनि सहयोगको प्रस्ताव गरेका छन्। पोप लियो चौधौँले प्रारम्भिक एक लाख युरो सहायता घोषणा गर्नुभएको छ। संयुक्त राष्ट्रसङ्घका महासचिव एन्टोनियो गुटेरेसले घटनाप्रति गहिरो दुःख व्यक्त गर्दै भेनेजुएलालाई सहयोग गर्न अन्तर्राष्ट्रिय समुदायसँग आग्रह गर्नुभएको छ।
संयुक्त राष्ट्रसङ्घीय मानवीय सहायता प्रमुख टम फ्लेचरले १२६ वर्षयताकै शक्तिशाली भूकम्पका कारण व्यापक अन्तर्राष्ट्रिय सहयोग आवश्यक पर्ने बताउनुभएको छ।
उद्धार तथा राहत कार्यलाई थप जटिल बनाउँदै ला गुआइरास्थित अन्तर्राष्ट्रिय विमानस्थलमा गम्भीर क्षति पुगेपछि विमानस्थल बन्द गरिएको छ। मृतकमध्ये दुई ब्राजिलियाली, दुई चिनियाँ, एक इटालेली तथा एक पोर्चुगाली नागरिक रहेको सम्बन्धित देशहरूले पुष्टि गरेका छन्।
क्यारिबियन तथा दक्षिण अमेरिकी टेक्टोनिक प्लेटको सीमामा अवस्थित भेनेजुएलाको उत्तरी तट भूकम्पीय दृष्टिले संवेदनशील क्षेत्र मानिन्छ। सन् १९९७ मा आएको भूकम्पमा ७३ जनाको मृत्यु भएको थियो भने सन् १९६७ को भूकम्पमा २३६ जनाले ज्यान गुमाएका थिए। सन् १९०० मा आएको ७.७ म्याग्निच्युडको भूकम्पपछि हालको ७.५ म्याग्निच्युडको भूकम्पलाई सबैभन्दा शक्तिशाली मानिएको छ।
भूकम्पको धक्का छिमेकी कोलम्बियासम्म महसुस गरिएको थियो। बोगोटाका बासिन्दाले सावधानीस्वरूप भवन खाली गरेका थिए। उत्तरी ब्राजिलका धेरै सहरमा पनि कम्पन महसुस भएको त्यहाँको भूकम्पीय निगरानी निकायले जनाएको छ।
राजधानी काराकासमा पनि त्रासको वातावरण फैलिएको छ। धेरै नागरिकले सडक तथा सवारीसाधनमै रात बिताएका छन्। ६० वर्षीया रिटा गोमेज आफ्नी छोरी बस्ने भवन ढलेको सामाजिक सञ्जालमार्फत थाहा पाएपछि राजधानी पुग्नुभएको थियो।
उहाँले उद्धारका लागि भारी उपकरण परिचालन गरिएको तथा स्थानीय बासिन्दाले उल्लेखनीय सहयोग गरिरहेको बताउँदै आफ्नी छोरी जीवितै भेटिने आशा अझै कायम रहेको बताउनुभयो।
