न्युयोर्क, ११ असार (रासस/एएफपी) :
अमेरिकी राष्ट्रपति डोनाल्ड ट्रम्पको आप्रवासीविरुद्धको कडा नीतिका बीच अध्यागमन तथा भन्सार प्रवर्तन (आईसीई) हिरासतमा मृत्यु हुने व्यक्तिको संख्या पछिल्लो एक दशककै उच्च स्तरमा पुगेको अधिकार समूहहरूले जनाएका छन्।
ह्युमन राइट्स वाच र फिजिसियन्स फर ह्युमन राइट्स ले संयुक्त रूपमा सार्वजनिक गरेको प्रतिवेदनअनुसार सन् २०२५ जनवरीमा ट्रम्पको दोस्रो कार्यकाल सुरु भएयता आईसीई हिरासतमा कम्तीमा ५२ जनाको मृत्यु भएको पुष्टि गरिएको छ।
ट्रम्पले दोस्रो कार्यकालमा अवैध आप्रवासन नियन्त्रणलाई उच्च प्राथमिकतामा राखेपछि अमेरिकी अधिकारीहरूले हजारौं आप्रवासीलाई हिरासतमा लिएको जनाइएको छ।
प्रतिवेदनका अनुसार सन् २०२५ जनवरीदेखि सन् २०२६ जनवरीसम्म आईसीई हिरासतमा वार्षिक मृत्युदर अघिल्लो वर्षको तुलनामा १४० प्रतिशतले वृद्धि भएको छ।
उक्त मृत्युदर ट्रम्पका पूर्ववर्ती जो बाइडेनको कार्यकालको तुलनामा करिब चार गुणा तथा ट्रम्पकै पहिलो कार्यकाल (सन् २०१७–२०२१) को तुलनामा दुई गुणाभन्दा बढी रहेको प्रतिवेदनमा उल्लेख छ।
प्रतिवेदनका सह–लेखक तथा ह्युमन राइट्स वाच का अनुसन्धानकर्ता रेगन विलियम्सलाई उद्धृत गर्दै एएफपीले हिरासतमा मृत्युदर अभूतपूर्व रूपमा बढेको जनाएको छ।
प्रतिवेदनमा समेटिएको एक घटनाअनुसार हिरासतमा रहेका एक व्यक्तिलाई स्ट्रोक भएपछि आवश्यक र समयमै चिकित्सा उपचार उपलब्ध नगराइएको उल्लेख गरिएको छ।
यस्तै, अर्का एक मेक्सिकी नागरिकको हृदयाघात भएपछि आवश्यक उपचार नपाउँदा मृत्यु भएको प्रतिवेदनमा उल्लेख छ।
प्रतिवेदनले आप्रवासन हिरासत केन्द्रहरूको संख्या विस्तार हुँदै जाँदा त्यहाँ उपलब्ध स्वास्थ्य सेवाको गुणस्तर र पहुँच कमजोर बन्दै गएको जनाएको छ।
हार्वर्ड मेडिकल स्कुलकी बालरोग विशेषज्ञ तथा प्रतिवेदनकी सह–लेखिका क्याथरिन पिलरले आईसीई हिरासतमा रहेका व्यक्तिको सुरक्षा र स्वास्थ्य संरक्षण गर्न अमेरिकी सरकार असफल भएको बताउनुभएको छ।
प्रतिवेदनले आईसीई हिरासतमा आत्महत्याका घटनाप्रति पनि ध्यानाकर्षण गराउँदै सन् २०२५ जनवरीदेखि सन् २०२६ जनवरीसम्म सात जना बन्दीले आत्महत्या गरेको जनाएको छ।
