काठमाडौं, असार ९ । बागमती सभ्यता एकीकृत विकास समितिले कीर्तिपुर होल्डिङ सेन्टरमा बसोबास गरिरहेका सुकुम्बासीलाई ५ दिनभित्र स्वःव्यवस्थापनमार्फत भवन खाली गर्न निर्देशन दिएको छ।

हाल सेन्टरमा ६८ परिवारका २०३ जना बसिरहेका छन्। प्रत्येक परिवारलाई स्वःव्यवस्थापनका लागि २५ हजार रुपैयाँ उपलब्ध गराइने समितिले जनाएको छ। रकम प्राप्त गर्न बैंक खाता नम्बर सहितको निवेदन पेस गर्नुपर्नेछ। समितिका अनुसार वास्तविक सुकुम्बासी प्रमाणित भएमा उनीहरूले आगामी दिनमा मासिक १५ हजार रुपैयाँ पनि पाउनेछन्।

समितिले कीर्तिपुरबाट प्रक्रिया सुरु गरेको जनाएको छ भने अन्य होल्डिङ सेन्टरमा रहेका परिवारलाई पनि क्रमशः स्वःव्यवस्थापन गराउने तयारी भइरहेको जनाएको छ। हट्न अस्वीकार गर्नेहरूको व्यवस्थापनबारे सरकारसँग छलफल भइरहेको समितिको भनाइ छ ।