काठमाडौं, ९ असार । कतारको रस लाफान औद्योगिक क्षेत्रस्थित ग्यास उत्पादन केन्द्रमा आइतबार भएको विस्फोटमा नेपालीसहित विभिन्न देशका ६६ भन्दा बढी नागरिक घाइते भएका छन्।

घटनामा १२ भारतीय र एक पाकिस्तानी गरी १३ जनाको मृत्यु भएको कतारी अधिकारीहरूले पुष्टि गरेका छन्। घाइतेहरूमा नेपाल, कतार, भारत, पाकिस्तान, बंगलादेश, केन्या, घाना, तान्जानिया र नाइजेरियाका नागरिक रहेका छन्। उनीहरूको उपचार भइरहेको भए पनि नामावली सार्वजनिक गरिएको छैन।

कतारका ऊर्जामन्त्री साद अल–काबीले घटनालाई तोडफोड वा आक्रमण नभई दुर्घटना भएको बताएका छन्। उनका अनुसार विस्फोटपछि लागेको आगो आइतबार राति नै नियन्त्रणमा लिइएको थियो र घटनाले ग्यास निर्यात, स्थानीय आपूर्ति तथा वातावरणमा कुनै प्रभाव पारेको छैन।

प्रत्यक्षदर्शीका अनुसार विस्फोटको आवाज राजधानी दोहासम्म सुनिएको थियो भने घटनापछि ठूलो आगोको ज्वाला र बाक्लो धुवाँ देखिएको थियो।