भक्तपुर नगरपालिका–१ नगरकोटमा गएराति सामान्य विवादका क्रममा भएको झैँझगडामा चक्कु प्रहारबाट एक युवकको मृत्यु भएको छ।

महोत्तरीको मिथिला नगरपालिका–९ घर भई हाल नगरकोट मोड बस्दै आएका २८ वर्षीय आकाश रसाइलीमाथि चक्कु प्रहार भएको थियो। गम्भीर घाइते रसाइलीलाई उपचारका लागि केएमसी अस्पताल, सिनामंगल लगिएकोमा आज बिहान ६:१५ बजे उपचारकै क्रममा मृत्यु भएको प्रहरीले जनाएको छ।

घटनामा संलग्न रहेको आरोपमा उदयपुर त्रियुगा नगरपालिका–१३ का ३१ वर्षीय आयुष कार्की, झापा दमक नगरपालिका–३ का २७ वर्षीय दोर्जे शेर्पा र गुल्मी तम्घासका ३५ वर्षीय रमेश कुँवरलाई प्रहरीले पक्राउ गरेको छ। घटनाबारे थप अनुसन्धान भइरहेको प्रहरीले जनाएको छ।