पर्वत, असार ८ । पर्वतको कुश्मा नगरपालिकाले स्थानीय किसानबाट रकम सङ्कलन गरेको तीन महिना बितिसक्दासमेत यान्त्रिक हलो (मिनिटिलर) वितरण नगर्दा किसान चिन्तित बनेका छन्।
नगरपालिकाले किसानलाई ५० प्रतिशत अनुदानमा यान्त्रिक हलो उपलब्ध गराउने कार्यक्रमअन्तर्गत गत चैतमै किसानबाट ५० प्रतिशत रकम सङ्कलन गरेको थियो। कुश्मा नगरपालिकाका १४ वटै वडाबाट ७०५ किसानले यान्त्रिक हलो प्राप्तिका लागि निवेदन दिएका थिए। तीमध्ये विभिन्न मापदण्डका आधारमा २०० किसान छनोट गरिएको थियो।
छनोट भएका किसानबाट प्रतिव्यक्ति २० हजार रुपैयाँका दरले रकम सङ्कलन गरिए पनि रकम बुझाएको तीन महिना बितिसक्दा पनि यान्त्रिक हलो उपलब्ध गराउन नसकिएको हो।
कुश्मा नगरपालिकाका प्रमुख प्रशासकीय अधिकृत किरण पौडेलका अनुसार बोलपत्र प्रक्रियाबाट छनोट भएको काठमाडौंस्थित क्वालिटी रिन्युयबल प्रालिले समयमै गुणस्तरीय उपकरण उपलब्ध गराउन नसक्दा वितरण कार्य ढिलाइ भएको हो।
नगरपालिकाले उक्त कम्पनीसँग ६२ लाख ७९ हजार रुपैयाँ लागतमा यान्त्रिक हलो खरिद गर्ने सम्झौता गरेको छ। गत जेठ २१ गते सम्झौता भए पनि कम्पनीले असारमा मात्र परीक्षणका लागि हलो उपलब्ध गराएको थियो। तर, दुई पटकसम्म परीक्षणका क्रममा उपकरणमा समस्या देखिएपछि पुनः आवश्यक मापदण्डअनुसारको हलो उपलब्ध गराउन आग्रह गरिएको कृषि शाखाका निमित्त प्रमुख बलबहादुर जिटीले जानकारी दिनुभयो।
उहाँका अनुसार नगरपालिकाले कम्तीमा सात हर्सपावर क्षमता र ८० किलोग्राम तौल भएको हलो माग गरेको थियो। तर, उपलब्ध गराइएका उपकरण उक्त मापदण्डअनुसार नभएकाले फिर्ता पठाइएको हो।
कुश्मा नगरपालिका–२ का किसान टीकाराम शर्माले नगरपालिकाबाट समयमै गुणस्तरीय यान्त्रिक हलो प्राप्त हुने आशामा रकम बुझाएको भए पनि हालसम्म उपकरण नपाउँदा खेतीपातीमा समस्या भएको बताउनुभयो।
“नगरपालिकाबाट समयमा नै गुणस्तरीय यान्त्रिक हलो आउला र वर्षे बाली लगाउन सहज होला भन्ने अपेक्षा थियो। तर, तीन महिना बितिसक्दा पनि हलो प्राप्त भएको छैन,” उहाँले भन्नुभयो, “अहिले खेतबारी जोत्न प्रतिघण्टा एक हजार रुपैयाँ तिर्नुपर्ने बाध्यता छ।”
अन्य किसानले पनि समयमा यान्त्रिक हलो उपलब्ध नगराएको भन्दै गुनासो गरेका छन्।
प्रमुख प्रशासकीय अधिकृत पौडेलले सम्झौता गरेको कम्पनीले समयमै गुणस्तरीय सामग्री उपलब्ध गराउन नसक्दा किसानले सास्ती खेप्नुपरेको स्वीकार गर्दै यथाशीघ्र हलो वितरणका लागि पहल भइरहेको बताउनुभयो।
अहिले धान रोपाइँको मुख्य समयमा यान्त्रिक हलो उपलब्ध नहुँदा किसान थप समस्यामा परेका छन्। पर्वत जिल्लामा यतिबेला धान र कोदो रोप्ने चटारो चलिरहेको छ।
