प्रहरीमा दर्ता भएको जाहेरीअनुसार ललितपुर महानगरपालिका–१, इमाडोलमा गत चैत २२ गते राति करिब ९ः३० बजे उक्त घटना भएको आरोप लगाइएको छ। पीडित महिलाले आफू गोदावरी नगरपालिका–१३, झरुवारासी आरुबोट निवासी रहेको उल्लेख गरेकी छन्।

जाहेरीअनुसार केसीले अत्यधिक मदिरा सेवन गरेको अवस्थामा पीडितमाथि जबर्जस्ती करणी गरेको तथा घटनाअघि जबर्जस्ती मदिरा पिलाएको आरोप लगाइएको छ। पीडितका अनुसार उनका श्रीमान्को २०८२ साल वैशाखमा निधन भएको थियो। शोकको अवस्थामै नाताले भाइ पर्ने केसीबाट आफू यौन हिंसामा परेको उनको दाबी छ।

पीडित महिलाले घटनापछि आरोपीले घटना बाहिर सार्वजनिक नगर्न दबाब दिँदै विभिन्न किसिमका मानसिक तनाव दिएको पनि जाहेरीमा उल्लेख गरेकी छन्। त्यसका कारण आफू मानसिक रूपमा गम्भीर आघातमा परेको र उपचारका लागि औषधि सेवन गर्नुपरेको उनले बताएकी छन्।

स्रोतका अनुसार जाहेरी दर्ता भएपछि जिल्ला प्रहरी परिसर ललितपुर र बारा प्रहरीबीच समन्वय गरी आरोपीलाई गत बुधबार सिमराबाट पक्राउ गरिएको थियो। त्यसपछि उनलाई हवाईमार्गबाट काठमाडौं ल्याई जिल्ला प्रहरी परिसर ललितपुरको जिम्मा लगाइएको बताइएको छ।

हाल घटनाबारे थप अनुसन्धान भइरहेको प्रहरीले जनाएको छ। पीडित महिलाको परिचय गोप्य राखिएको छ। स्रोतका अनुसार उक्त मुद्दा जिल्ला प्रहरी परिसर ललितपुरमा दर्ता भएको छ भने मुद्दा दर्ता नम्बर १०४२ रहेको बुझिएको छ।

यसैबीच, पीडित महिलाले सामाजिक दृष्टिकोण तथा घटनाबाट परेको मानसिक आघातका कारण आफू अत्यन्त पीडामा रहेको बताएकी छन्। उनले जबर्जस्ती करणीजस्तो गम्भीर अपराधको मुद्दा मिलापत्र गराउन केही प्रभावशाली व्यक्तिहरूले दबाब दिने प्रयास गरेको आरोपसमेत लगाएकी छन्। यद्यपि, उक्त आरोपबारे सम्बन्धित पक्षको प्रतिक्रिया प्राप्त हुन सकेको छैन।

प्रहरीले घटनासम्बन्धी सबै पक्षबाट अनुसन्धान भइरहेको र प्राप्त तथ्य तथा प्रमाणका आधारमा कानुनबमोजिम आवश्यक प्रक्रिया अघि बढाइने जनाएको छ।