उदयपुर, असार ६ । उदयपुर जिल्लाको उदयपुरगढी गाउँपालिका–७ जोगीटोलमा शनिबार बिहान भएको स्कुल बस दुर्घटनामा एक जनाको मृत्यु भएको छ भने ३० जना घाइते भएका छन्।
शनिबार बिहान करिब ८:५० बजे महोत्तरीबाट सुनसरीतर्फ जाँदै गरेको बा २ ख ६४३८ नम्बरको दीप एजुकेशन बोर्डिङ स्कुलको स्टाफ बोकेको बस अनियन्त्रित भई सडकबाट करिब १२ मिटर तल खस्दा दुर्घटना भएको प्रहरीले जनाएको छ।
दुर्घटनामा गम्भीर घाइते भएका महोत्तरीको बर्दिबास नगरपालिका निवासी ५५ वर्षीय विमलेश दत्तको उपचारका क्रममा मृत्यु भएको हो।
प्रहरीका अनुसार दुर्घटनामा ३० जना घाइते भएका छन्। घाइतेमध्ये २ जनाको अवस्था गम्भीर, ५ जनाको अवस्था मध्यम तथा २३ जनाको अवस्था सामान्य रहेको छ। गम्भीर घाइते रसिला कुमारी चौधरी र सन्देश कुमार चौधरीलाई थप उपचारका लागि विराटनगरस्थित न्युरो अस्पताल रिफर गरिएको छ।
बस चालक महोत्तरीको गौशाला नगरपालिका–१० निवासी २८ वर्षीय जीवन आले सकुशल रहेको प्रहरीले जनाएको छ।
दुर्घटनाको कारणबारे प्रहरीले थप अनुसन्धान गरिरहेको छ।
