काठमाडौँ । पछिल्ला केही दिनदेखि निरन्तर भइरहेको वर्षा, बाढी, पहिरो तथा सडक मर्मत कार्यका कारण देशका विभिन्न मुख्य राजमार्गहरूमा सवारी आवागमन प्रभावित भएको छ। सडक विभागको पछिल्लो विवरणअनुसार आज बिहानसम्म कोशी, बागमती र गण्डकी प्रदेशका विभिन्न सडक खण्डहरूमा पूर्ण तथा आंशिक अवरोध देखिएको छ।
कोशी प्रदेशमा बाढीको असर
कोशी प्रदेशका विभिन्न जिल्लामा बाढीका कारण प्रमुख राजमार्गहरू प्रभावित भएका छन्। भोजपुर नगरपालिका–५ बोखिम र पाँचथरको याङवरक गाउँपालिका–२ दोभान क्षेत्रमा आएको बाढीले मध्यपहाडी लोकमार्गमा क्षति पुर्याएको छ। त्यस्तै, इलाम नगरपालिका–९ राजदुवालीमा बाढीका कारण मेची राजमार्ग पनि प्रभावित बनेको छ।
यी तीनै स्थानमा हाल सवारी साधन एकतर्फी रूपमा सञ्चालन भइरहेको सडक विभागले जनाएको छ।
बीपी राजमार्गमा पूर्ण रोक
बागमती प्रदेशअन्तर्गत पर्ने बीपी राजमार्गको खुर्कोट–नेपालथोक–कटुञ्जेबेंसी सडक खण्डमा सम्भावित बाढीको उच्च जोखिमलाई ध्यानमा राख्दै सवारी साधन सञ्चालनमा पूर्ण रोक लगाइएको छ।
काठमाडौँ जोड्ने वैकल्पिक सडक एक महिनाका लागि बन्द
मकवानपुरको कुलेखानी–फाखेल–हुमाने–फर्पिङ हुँदै काठमाडौँ जोड्ने सडक खण्डमा मर्मत कार्य जारी रहेकाले उक्त सडक आगामी एक महिनासम्म पूर्ण रूपमा बन्द गरिएको छ। यस मार्ग प्रयोग गर्ने यात्रु तथा सवारी चालकलाई वैकल्पिक सडक प्रयोग गर्न सम्बन्धित निकायले आग्रह गरेको छ।
गण्डकी प्रदेशमा पहिरोले सडक ठप्प
गण्डकी प्रदेशमा पहिरोका कारण दुई महत्वपूर्ण सडक खण्ड पूर्ण रूपमा अवरुद्ध भएका छन्। लमजुङको बेँसीसहर नगरपालिका–६ खरखरे भीरमा खसेको पहिरोले बेँसीसहर–मनाङ सडक खण्ड पूर्ण रूपमा बन्द भएको छ।
त्यसैगरी, नवलपरासी (पूर्व) को गैँडाकोट नगरपालिका–३ घोक्रफाँट क्षेत्रमा आज बिहान खसेको पहिरोका कारण कालीगण्डकी करिडोरसमेत पूर्ण रूपमा अवरुद्ध भएको छ।
सतर्कता अपनाउन आग्रह
लगातारको वर्षासँगै देशका विभिन्न स्थानमा बाढी र पहिरोको जोखिम बढ्दै गएको छ। सम्बन्धित निकायले यात्रा गर्दा सडकको अवस्था बुझेर मात्र यात्रा गर्न तथा जोखिमयुक्त क्षेत्रहरूमा विशेष सतर्कता अपनाउन सर्वसाधारणलाई आग्रह गरेका छन्।
