काठमाडौँ, असार ५ । काठमाडौँ जिल्ला अदालतले राष्ट्रिय स्वतन्त्र पार्टी (रास्वपा) का सभापति रवि लामिछाने विरुद्ध लगाइएको सङ्गठित अपराधसम्बन्धी अभियोग फिर्ता लिन अनुमति दिएको छ।
जिल्ला अदालतका न्यायाधीश आत्मदेव जोशी को इजलासले लामिछानेको मागअनुसार सङ्गठित अपराधसम्बन्धी अभियोग फिर्ता लिन आदेश दिएको हो। इजलासले मुलुकी फौजदारी कार्यविधि संहिता, २०७४ को दफा ३६ बमोजिम लामिछानेसहितका प्रतिवादीहरूमाथि लगाइएको उक्त अभियोग हटाउन आदेश दिएको जनाएको छ।
यद्यपि, अदालतले लामिछानेविरुद्धको सहकारी ठगीसम्बन्धी अभियोग भने यथावत् कायम रहने स्पष्ट गरेको छ।
सुमन खनाल लगायतको जाहेरीका आधारमा नेपाल सरकार वादी रहेको तथा रवि लामिछानेसहित अन्य प्रतिवादीविरुद्ध दायर सहकारी ठगी तथा सङ्गठित अपराधसम्बन्धी मुद्दामा जिल्ला सरकारी वकिल कार्यालय, काठमाडौँले अभियोगपत्र संशोधनका लागि निवेदन दायर गरेको थियो।
उक्त निवेदनमाथि सुनुवाइ गर्दै अदालतले सङ्गठित अपराधसम्बन्धी अभियोग फिर्ता लिन अनुमति दिएको हो।
