भालुवाङ, असार ५ । दाङको राप्ती गाउँपालिका–१, भालुवाङ पुल्चोक निवासी शिवबहादुर खत्रीका १२ वर्षीय छोरा शुशान्त खत्रीको राप्ती नदीमा डुबेर मृत्यु भएको छ ।
अत्यधिक गर्मीका कारण राप्ती गाउँपालिका शिक्षा समन्वय शाखाले शुक्रबार विद्यालयहरूमा बिदा दिएको थियो। बिदाको अवसरमा शुशान्त साथीहरूसँग दिउँसो करिब १२ बजे नजिकैको राप्ती नदीमा पौडी खेल्न गएका थिए ।
पौडी खेल्ने क्रममा प्रगन्ना सिँचाइ नहरको दोस्रो इन्टेक क्षेत्रअन्तर्गत पाखापानीस्थित राप्ती नदीको मूल नहर शाखामा उनी डुबेका थिए । लामो समयसम्म घर नफर्किएपछि उनका साथीहरूले परिवारलाई खबर गरेका थिए। त्यसपछि उनका बुवासहित स्थानीयवासीले खोजी गर्दा उनी डुबिरहेको अवस्थामा फेला परेका थिए ।
उनीलाई तत्काल उपचारका लागि भालुवाङ अस्पताल पुर्याइए पनि चिकित्सकले मृत घोषणा गरेका थिए। इलाका प्रहरी कार्यालय भालुवाङका अनुसार बालकको शव पोस्टमार्टमका लागि लमही अस्पताल पठाइएको छ ।
मृतक शुशान्त पुल्चोकस्थित लिटिल एन्जल स्कुलमा अध्ययनरत थिए ।
