सीएनएनले सार्वजनिक गरेको अमेरिका–इरान युद्धविरामसम्बन्धी प्रारम्भिक मस्यौदा (१४-बुँदे रूपरेखा) को पूर्ण पाठ यस प्रकार रहेको छः

१. इस्लामिक गणतन्त्र इरान, संयुक्त राज्य अमेरिका तथा वर्तमान द्वन्द्वमा सहभागी उनीहरूका सहयोगीहरूले यस समझदारीपत्रमा हस्ताक्षर भएलगत्तै लेबनानसहित सबै मोर्चामा युद्धको तत्काल तथा स्थायी अन्त्य घोषणा गर्नेछन्। साथै, उनीहरूले एकअर्काविरुद्ध कुनै पनि शत्रुतापूर्ण गतिविधि नगर्ने तथा बल प्रयोग वा बल प्रयोगको धम्कीबाट टाढा रहने प्रतिबद्धता व्यक्त गर्नेछन्। अन्तिम सम्झौताले यस तथा अन्य सबै धाराका प्रावधानहरूलाई पुष्टि गर्नेछ।

२. इस्लामिक गणतन्त्र इरान र संयुक्त राज्य अमेरिकाले एकअर्काको सार्वभौमिकता तथा भौगोलिक अखण्डताको सम्मान गर्ने तथा आन्तरिक मामिलामा हस्तक्षेप नगर्ने प्रतिबद्धता जनाउनेछन्।

३. दुवै पक्षले अधिकतम ६० दिनभित्र अन्तिम सम्झौतामा पुग्ने गरी वार्ता सम्पन्न गर्ने सहमति जनाउनेछन्। आवश्यक परे आपसी सहमतिमा समयावधि थप गर्न सकिनेछ।

४. समझदारीपत्रमा हस्ताक्षर भएसँगै संयुक्त राज्य अमेरिकाले नौसैनिक नाकाबन्दी हटाउने, इरानविरुद्ध गरिने अवरोध तथा हस्तक्षेप रोक्ने र अधिकतम ३० दिनभित्र समुद्री यातायातलाई पूर्ण क्षमतामा पुनःस्थापित गर्नेछ। जहाजहरूको आवतजावत युद्धपूर्व अवस्थाअनुसार पुनः सञ्चालन गरिनेछ। अन्तिम सम्झौतापछि ३० दिनभित्र अमेरिकाले क्षेत्रबाट आफ्ना सैन्य बल फिर्ता लैजाने प्रतिबद्धता पनि जनाएको छ।

५. समझदारीपत्रमा हस्ताक्षर भएपछि इरानले फारसी खाडी र ओमान सागरबीच हुने व्यापारिक जहाजहरूको आवतजावत ३० दिनभित्र युद्धपूर्व स्तरमा पुनःस्थापित गर्न आवश्यक कदम चाल्नेछ। यस क्रममा प्राविधिक अवरोध हटाउने तथा बारुदी सुरुङ निष्क्रिय पार्ने कार्यलाई प्राथमिकता दिइनेछ।

६. संयुक्त राज्य अमेरिकाले आफ्ना क्षेत्रीय साझेदारहरूसँगको सहकार्यमा इरानको पुनःस्थापना तथा आर्थिक विकासका लागि कम्तीमा ३०० अर्ब अमेरिकी डलर बराबरको वित्तीय व्यवस्थासहितको व्यापक योजना तयार गर्ने प्रतिबद्धता जनाएको छ। अन्तिम सम्झौताअन्तर्गत यस योजनाको कार्यान्वयन संयन्त्र ६० दिनभित्र तयार गरिनेछ।

७. संयुक्त राज्य अमेरिकाले अन्तिम सम्झौतामा तय हुने कार्यतालिकाअनुसार इरानमाथि लागू सबै प्रकारका प्रतिबन्ध हटाउने प्रतिबद्धता जनाएको छ। यसमा संयुक्त राष्ट्रसंघ सुरक्षा परिषद्का प्रस्ताव, अन्तर्राष्ट्रिय आणविक ऊर्जा एजेन्सी (आईएईए) को गभर्नर बोर्डका निर्णय तथा प्राथमिक र द्वितीयक सबै अमेरिकी प्रतिबन्ध समावेश हुनेछन्।

८. इस्लामिक गणतन्त्र इरानले आफूले कहिल्यै पनि आणविक हतियार उत्पादन नगर्ने प्रतिबद्धता पुनः दोहोर्‍याएको छ। दुवै पक्षले समृद्ध पारिएको आणविक सामग्रीको भविष्य, इरानका आणविक आवश्यकता तथा अन्य पारस्परिक रूपमा सहमत विषयहरू अन्तिम सम्झौतामार्फत सम्बोधन गर्ने सहमति गरेका छन्।

९. अन्तिम सम्झौता नभएसम्म दुवै पक्ष यथास्थिति कायम राख्न सहमत भएका छन्। इरानले आफ्नो आणविक कार्यक्रम यथावत् राख्नेछ भने अमेरिकाले नयाँ प्रतिबन्ध नलगाउने तथा क्षेत्रमा सैन्य उपस्थिति नबढाउने प्रतिबद्धता जनाएको छ।

१०. संयुक्त राज्य अमेरिकाले समझदारीपत्रमा हस्ताक्षर भएको मितिदेखि प्रतिबन्ध हटाइने समयसम्म इरानी कच्चा तेल, पेट्रोकेमिकल उत्पादन तथा तिनका सहउत्पादनहरूको निर्यातमा छुट दिने प्रतिबद्धता जनाएको छ। यसमा बैंकिङ, बीमा, ढुवानी तथा सम्बन्धित अन्य सेवाहरू पनि समावेश हुनेछन्।

११. संयुक्त राज्य अमेरिकाले अन्तिम सम्झौताका लागि जारी वार्ताको प्रगतिअनुसार इरानका रोक्का वा सीमित गरिएका कोष तथा सम्पत्तिहरू मुक्त गरी पूर्ण रूपमा उपलब्ध गराउने प्रतिबद्धता जनाएको छ। ती रकमहरू इरानको केन्द्रीय बैंकले निर्धारण गरेका अन्तिम लाभग्राहीहरूलाई भुक्तानी गर्न प्रयोग गर्न सकिनेछ। यसका लागि आवश्यक सबै अनुमति तथा इजाजतपत्र जारी गरिनेछ।

१२. इरान र संयुक्त राज्य अमेरिका अन्तिम सम्झौताको सफल कार्यान्वयन तथा भविष्यमा त्यसको पालना सुनिश्चित गर्न संयुक्त कार्यान्वयन संयन्त्र स्थापना गर्न सहमत भएका छन्।

१३. समझदारीपत्रमा हस्ताक्षर भएपछि तथा धारा ४, ५, १० र ११ को कार्यान्वयन सुरु भएको पुष्टि भएपछि, र ती कार्यहरू निरन्तर रूपमा अघि बढिरहेमा, दुवै पक्ष बाँकी विषयवस्तुसम्बन्धी अन्तिम सम्झौताका लागि औपचारिक वार्तामा प्रवेश गर्नेछन्।

१४. अन्तिम सम्झौता संयुक्त राष्ट्रसंघ सुरक्षा परिषद्को बाध्यकारी प्रस्तावमार्फत अनुमोदन गरिनेछ।