राँझा (बाँके), असार ४ । बाँकेमा निर्माणाधीन सिक्टा सिँचाइ आयोजनाले नहरमा नियमित रूपमा पानी उपलब्ध गराउन थालेपछि यहाँक किसान उत्साहित भएका छन्।

राप्तीसोनारी गाउँपालिका–२, अगैयास्थित राप्ती नदीमा बाँध निर्माण गरी सञ्चालन गरिएको सिक्टा सिँचाइ आयोजनाले मर्मतसम्भारको अवधिबाहेक किसानको मागअनुसार वर्षभरि नहरमा नियमित रूपमा पानी छोड्दै आएको छ।

सिक्टा सिँचाइ आयोजनाका सूचना अधिकारी तथा सिनियर डिभिजनल इन्जिनियर मनोजकुमार साहका अनुसार किसानलाई सिँचाइ अभाव हुन नदिन वर्षभरि आवश्यकताअनुसार पानी उपलब्ध गराइँदै आएको छ।

“हामीले किसानको आवश्यकतालाई प्राथमिकतामा राखेर मर्मतसम्भारको समयबाहेक उहाँहरूको मागअनुसार वर्षभरि नहरमा पानी उपलब्ध गराउँदै आएका छौँ,” उहाँले भन्नुभयो, “यसले गर्दा किसानले समयमै धान र गहुँ खेती मात्र नभई व्यावसायिक रूपमा बेमौसमी तरकारी खेतीसमेत गरी आर्थिक लाभ लिन थालेका छन्।”

उहाँका अनुसार राप्तीसोनारी गाउँपालिका–२, अगैयास्थित राप्ती नदीमा बाँध निर्माण गरी सञ्चालन गरिएको आयोजनाले जिल्लाका ४२ हजार ७६६ हेक्टर जमिनमा सिँचाइ सुविधा पुर्‍याउने लक्ष्य लिएको छ। हालसम्म २४ हजार हेक्टर जमिनमा प्रत्यक्ष रूपमा नियमित सिँचाइ सुविधा उपलब्ध गराइएको छ।

विगतमा आकाशे पानीको भरमा धान खेती गर्दै आएका राप्तीसोनारी गाउँपालिका, कोहलपुर नगरपालिका तथा बैजनाथ गाउँपालिकाका किसानले नियमित सिँचाइ सुविधा पाएपछि यस वर्ष समयमै धानको बीउ राख्न सफल भएका छन्।

हालसम्म पर्याप्त वर्षा नभए पनि सिक्टा सिँचाइ सुविधा पुगेका क्षेत्रमा किसानहरूले धानको बीउ हुर्काइसकेको राप्तीसोनारी गाउँपालिका–७ का वडाध्यक्ष रामलखन थारुले बताउनुभयो। उहाँले राप्तीसोनारी गाउँपालिकाको वडा नं. ६ र ७ अन्तर्गत फत्तेपुर क्षेत्रका किसानले समयमै धानको बीउ राखिसकेको उल्लेख गर्दै सिक्टा सिँचाइ आयोजना किसानका लागि वरदान सावित भएको बताउनुभयो।

सिँचाइको नियमित सुविधा पुगेको २४ हजार हेक्टर क्षेत्रफलमा किसानहरूले समयमै धानको बीउ राख्न पाएका छन्। बाँकेमा सिक्टाको सिँचाइ सुविधा नपुगेका क्षेत्रमा भने घरायसी प्रयोजनका लागि प्रयोग हुने मोटर तथा कतिपय स्थानमा खानेपानीको धारा प्रयोग गरेर समेत धानको ब्याड तयार गरिएको छ।

कृषि ज्ञान केन्द्र बाँकेकी सूचना अधिकारी सुजिता शर्माका अनुसार जिल्लामा सिँचाइ सुविधा पुगेका तथा वैकल्पिक उपाय अपनाएका क्षेत्रसमेत गरी हालसम्म करिब ४५ प्रतिशत किसानले धानको बीउ ब्याड राखिसकेका छन्।

बाँके जिल्लामा प्रत्येक वर्ष ३३ हजार ७८० हेक्टर क्षेत्रफलमा वर्षे धान खेती हुने गरेको छ।