काठमाडौं । फेसन, सिर्जनशीलता, कथावाचन (स्टोरीटेलिङ) तथा डिजिटल प्रभावका क्षेत्रमा योगदान पुर्‍याएका उत्कृष्ट कन्टेन्ट क्रिएटरहरूलाई अजमेरा फेसन डिजाइन एक्सिलेन्स अवार्ड–२०२६ प्रदान गरिएको छ।

राजधानीमा आयोजित कार्यक्रममा तीन विधाका उत्कृष्ट सर्जकलाई नगद पुरस्कारसहित सम्मान गरिएको हो। बेस्ट इन्गेजमेन्ट भिडियो विधामा नमामी शाक्य र बेस्ट ब्रान्ड भिडियो विधामा प्रथा जोशी विजेता घोषित हुँदै जनही एक लाख रुपैयाँ नगद पुरस्कार प्राप्त गरे। त्यस्तै बेस्ट कन्सेप्ट एण्ड स्टोरीटेलिङ विधामा सुभाना कायस्थ उत्कृष्ट घोषित भई २५ हजार रुपैयाँ नगद पुरस्कारबाट सम्मानित भइन्।

प्रत्येक विधामा अन्तिम छनोटमा परेका तीन–तीन प्रतिस्पर्धीमध्ये उत्कृष्ट एक जनालाई विजेता घोषणा गरिएको आयोजकले जनाएको छ। विजेताहरूलाई अजमेरा फेसन लिमिटेड, भारतका संस्थापक तथा प्रमुख कार्यकारी अधिकृत (सीईओ) Ajay Ajmera ले पुरस्कार तथा प्रमाणपत्र प्रदान गरेका थिए।

ब्ल्याक बुल गार्मेन्ट ट्रेडिङ प्रालिको प्रस्तुतिमा तथा अजमेरा फेसन प्रालिको आयोजनामा सम्पन्न कार्यक्रमले फेसन, डिजिटल कन्टेन्ट निर्माण, स्टोरीटेलिङ तथा सामाजिक सञ्जालमार्फत सिर्जनशील योगदान पुर्‍याउने प्रतिभाहरूलाई प्रोत्साहन गर्ने उद्देश्य राखेको आयोजकले जनाएको छ।

कार्यक्रममा फेसन व्यवसायी, कलाकार, डिजिटल क्रिएटर, इन्फ्लुएन्सर तथा विभिन्न क्षेत्रका विशिष्ट व्यक्तित्वहरूको उल्लेखनीय सहभागिता रहेको थियो। आयोजकका अनुसार यस्ता अवार्डहरूले नेपालमा बढ्दो फेसन तथा डिजिटल कन्टेन्ट उद्योगलाई थप ऊर्जा र प्रेरणा प्रदान गर्ने विश्वास गरिएको छ।

कार्यक्रमलाई प्रिफ्याब प्यानल नेपाल, १०० पसल कुमारीपाटी, जेबी अटोमोटिभ तथा कलश स्टक मार्केटलगायत संस्थाहरूले सहयोग गरेका थिए।