काबुल, २७ जेठ (रासस/एएनआई) । अफगानिस्तानको तालिबान सरकारले पाकिस्तानद्वारा गरिएको पछिल्लो हवाई आक्रमणमा कम्तीमा १३ सर्वसाधारणको ज्यान गएको तथा १४ जना घाइते भएको जनाएको छ। घटनापछि दुई देशबीचको सम्बन्ध थप तनावपूर्ण बनेको छ भने सीमावर्ती क्षेत्रको सुरक्षा अवस्थाप्रति चिन्ता बढेको छ।

तालिबानका प्रवक्ता जबिहुल्लाह मुजाहिदका अनुसार मङ्गलबार राति र बुधबार बिहानको बीचमा पाकिस्तानले अफगानिस्तानको कुनार, खोस्त र पक्तिका प्रान्तका विभिन्न बस्तीलाई लक्षित गरी हवाई आक्रमण गरेको थियो। उक्त आक्रमणमा ११ बालबालिका, एक महिला र एक वृद्ध पुरुषको मृत्यु भएको बताइएको छ।

घटनामा १४ जना महिला घाइते भएका छन्। तालिबानले आक्रमणपछि क्षतिग्रस्त क्षेत्रका तस्बिरहरू सार्वजनिक गर्दै यसलाई अफगानिस्तानको सार्वभौमसत्तामाथिको गम्भीर उल्लङ्घन तथा निर्दोष नागरिकमाथिको आक्रमणको संज्ञा दिएको छ।

अफगान अधिकारीहरूका अनुसार पछिल्लो एक वर्षमा अफगान भूमिमा भएका पाकिस्तानी सैन्य कारबाहीका कारण सयौँ नागरिक प्रभावित भएका छन्। सीमापार आक्रमण र सैन्य गतिविधि बढ्दै जाँदा दुई देशबीचको सम्बन्ध निरन्तर बिग्रँदै गएको बताइएको छ।

तालिबानले यसअघि मार्च महिनामा भएको अर्को ठूलो हवाई आक्रमणमा पाकिस्तानले काबुलस्थित पुनर्वास केन्द्रलाई निशाना बनाएको आरोप लगाएको थियो। तालिबानका अनुसार उक्त घटनामा २६९ जनाको ज्यान गएको थियो। त्यसयता सीमावर्ती क्षेत्रमा पटक–पटक सैन्य कारबाही र झडपका घटना दोहोरिँदै आएका छन्।

विश्लेषकहरूका अनुसार अक्टोबर २०२५ मा पाकिस्तानले काबुलसहित अफगानिस्तानका विभिन्न क्षेत्रमा व्यापक हवाई आक्रमण गरेपछि दुई देशबीचको लामो समयदेखिको तनाव खुला सीमापार द्वन्द्वतर्फ उन्मुख भएको देखिएको छ। निरन्तरको असुरक्षा र झडपका कारण हजारौँ अफगान नागरिक विस्थापित भएका छन् भने धेरै परिवार घरबार छाड्न बाध्य भएका छन्।

तालिबानले पाकिस्तानमाथि आफ्ना आन्तरिक सुरक्षा चुनौतीलाई बहाना बनाएर अफगान भूमिमा बारम्बार सैन्य हस्तक्षेप गरिरहेको आरोप लगाएको छ। यता पाकिस्तानले भने तहरीक–ए–तालिबान पाकिस्तान (टिटिपी) र बलुचिस्तान लिबरेसन आर्मी (बिएलए) जस्ता विद्रोही समूहलाई अफगान भूमिबाट सहयोग मिलिरहेको दाबी गर्दै आएको छ।

इस्लामाबादले तालिबानमाथि ती समूहलाई आश्रय दिएको आरोप दोहोर्‍याउँदै आए पनि तालिबानले त्यसलाई निरन्तर अस्वीकार गर्दै आएको छ। तालिबानको भनाइमा पाकिस्तानले आफ्ना सुरक्षा कमजोरी ढाकछोप गर्न अफगानिस्तानमाथि आधारहीन आरोप लगाउने गरेको छ।

सन् २०२१ मा तालिबान पुनः सत्तामा फर्किएपछि सुरुआतमा अपेक्षा गरिएको मैत्रीपूर्ण सम्बन्ध लामो समय टिक्न नसकेको विश्लेषकहरूको भनाइ छ। एक समय तालिबानको प्रमुख समर्थक मानिएको पाकिस्तान र अफगानिस्तानबीच अहिले अविश्वास गहिरिँदै गएको छ। पछिल्ला घटनाक्रमहरूले दुई छिमेकी देशबीचको सम्बन्ध अझ जटिल र तनावपूर्ण बन्दै गएको संकेत गरेका छन्।